Skill development chungchang sawiho a ni
UN Joint Initiative Project
hnuaia skill development kalpui dan tur ngaihtuahin nimin khan chief secretary Lalmalsawma hoin department hrang hrang aiawh leh NLUP Implementing Board hotute CS conference hall-ah an ṭhukhawm.
Lalmalsawma chuan, Mizo ṭhalai, hna thiam bik nei lote'n eizawnna an neih theihna tura skill development lamah ṭan lak nasat a ṭul thu sawiin, "Awmze neia skill development kalpui turin Mizoramin tlakchham a neihte ngun taka hriat hmasak a ṭul. Ram mamawh leh a hun mila skill development kalpui turin department hrang hrangte chu an finna leh hriatnate thawh khawm a, ruahmanna mumal tak duan leh ṭan lak tlan a pawimawh," a ti.
Chief Secretary tarlan danin, India ram puma naupang kum 6-16 inkar vaibelchhe 30 zinga 10% chauh sikul zirna zo thei tura chhût an ni a; kum tin hna thawk thei rual mi nuai 130 zinga 25% chu primary education zo an nih laiin, 45% chu ziak leh chhiar thiam lo an ni. Kum 2020-ah India ram mihring awm zawng zawng zinga 60% vel chu hna thawk thei tura chhûtin, sorkar laipuiin kum 2020-ah ṭhalai maktaduai 500 chu thiam thil neia hna thawk thei tura buatsaih chu policy pawimawh takah a nei a ni.
Meeting-ah hian department hrang hrangte'n skill development programme leh scheme an kalpui dante ngaihthlak a ni. Hemi kawnga Mizoram mamawh leh tlâkchhamte sawiho a ni a; awmze neia skill development kalpui turin tunlai dinhmun mila zir tur syllabus siam te, hna pêng hrang hranga thawktu indaihlona leh thawktu mamawh dan zir chian te, training chhunga internship period neih a pawimawhna te, skill development atan department hrang hrangte hmalakna inthlunzawm dan turte sawiho a ni.