Lalsawta'n statistics inang neih ṭul a ti

Planning & Programme Implementation minister Lalsawta chuan, department hrang hrangin Mizoram tana statistical data an buatsaihah inang lo chi hrang hrang awm ṭhin chu tihbo ṭul a tih thu a sawi.

Lalsawta hian nimin khan Nursery Venga Economics & Statistics directorate office a tlawh a, department hotute nen an hmalakna leh hnathawh dan hrang hrangte an sawiho a ni. Lalsawta chuan, Mizoram pum tana statistics pakhat rintlak buatsaih a ngaih pawimawh thu sawiin, chutiang atana Economics & Statistics department chu inbuatsaih turin a chah.

Economics & Statistics department hian hna hrang hrang - National Sample Survey, Registration of Births & Deaths, Consumer Price Index, Agriculture Census, Meteorological Data, State and District Domestic Product, Census of Government Employees, Hospital Statistics, Statistical Handbook leh Statistical Abstract-te a buatsaih ṭhin a ni.

Government of India-in survey tura a rawn tuk - Basic Statistics for Local Level Development, Building Statistics, Employment & Unemployment Statistics, Economic Census te an buaipui bawk.

Planning & Programme Implementation minister hi parliamentary secretary (Planning) KS Thanga leh Planning secretary Dr C Vanlalramsanga ten an ṭawiawm a ni.