Advocate General leh ukil palite rawih nan Sorkarin kum 5-ah Rs. 1,48,52,110 a sêng

Mizoram sorkar chuan Gauhati High Court-a advocate general Biswajit Deb leh sorkar ukil palite rawih nan kum nga, 2011-2016 chhungin Rs. 1,48,52,110 a sêng.

Thu dawn danin, advocate general Biswajit Deb hi Kolkata-a awm a ni a, February 2, 2009 aṭangin Mizoram sorkarin a ruai ṭan. A rawihna atan Mizoram sor-karin Rs. 36,99,340 a seng tawh a; chung zingah chuan, amah rawihna aiin a zinna atana sorkarin a sen a tam zawk. Chutih laiin, Mizoram sorkarin AG a rawihna man hi state lian zawkte ngaihtuah chuan a tam lutuk lo niin an sawi.

Biswajit Deb hi High Court-a vawi 189 ding tawha chhinchhiah a ni a; High Court-a a dinna man bik chu January 2011 aṭanga January 2016 thleng khan chhût a ni. High Court-a a vawi khat din man a inang lo a, kum nga chhunga sorkarin thla khata a sen tam ber chu December 2015 kha niin, Rs. 37,700 a hlawh. December 2015-a Mizorama a zinna senso atan Mizoram sorkarin Rs. 46,861 a hmang a, High Court-a a dinna atana sen zat aiin a tam. December 2015-a sen zawng zawng chu Rs. 84,561 a ni.

Mizoram Advocate General zinna senso atan Mizoram sorkarin thla khatah cheng nuai chuang a sên ṭumte a awm a; chutih laiin, High Court-a a dinna leh a zinna senso atana sum hman tam ber thla chu March 2015 niin, Rs. 1,25,874 hman a ni.

Law & Judicial department hotute chuan, sorkarin a koh leh ṭul pawimawh danga a lo kal chang chuan, thla khatah vawi hnih/thum a lo kal ṭhin avangin, a zinna senso a tam phah niin an sawi.

Mizoram sorkar chuan Gau-hati High Court-a ding turin ukil pali a ruai a; chungte chu - AK Rokhum, Aldrin Lallawmzuala, Linda Fambawl leh Melody-te an ni. Anni rawih nan hian kum 2011 aṭanga January 2016 thleng khan Rs. 1,11,52,770 a seng tawh. Tun hnaiah Vanlalhriata a rawih belh leh bawk.

Mizoram sorkar ukil palite hian thubuaia dinna an neih tam dan azirin sum sen pawh a tam a, kum ruk chhunga anni pali rawihna atana sorkarin kum tina a sen zat a inang lo hle. Senso tam ber kum chu 2015 niin, Rs. 43,34,890 hman a ni a, sentlem ber kum 2012-ah Rs. 9,15,845 hman a ni. Kumin January thlaah Rs. 2,39,410 hman a ni tawh.

Advocate General rawihna senso zat

Kum Professional fee TA Total

2011 Rs. 2,41,000 Rs. 3,05,603 Rs. 5,46,603

2012 Rs. 2,38,900 Rs. 4,00,812 Rs. 6,39,712

2013 Rs. 2,97,300 Rs. 3,68,694 Rs. 6,65,994

2014 Rs. 3,12,000 Rs, 4,93,678 Rs. 8,05,678

2015 Rs. 2,82,100 Rs. 6,81,492 Rs. 9,63,592

2016 (Jan) Rs. 19,500 Rs. 58,261 Rs. 77,761

Total Rs. 13,90,800 Rs. 23,08,540 Rs. 36,99,340

Ukil 4 tana sorkar sum sen

Kum Professional

Fee (Rs.)

2011 16,12,575

2012 9,15,845

2013 17,12,745

2014 23,37,305

2015 43,34,890

2016 (Jan) 2,39,410

Total 1,11,52,770