Horticulture College hmun tur kawng lai mek

Union Agriculture & Farmer Welfare minister Radha Mohan Singh-a'n June 18, 2016-a lung--phùm a phùm tâk, Horticulture College hmun tur, Thenzawl Veng-thara mi chu a panna tur kawng laih mek a ni. Building sakna tur hmunhma, ram leilungte enfiah mek a ni.

Thenzawl aṭanga thu dawn danin, Horticulture College tur ram hi ni-min khan Vantawng chanchinbu enkawltute'n an tlawh a, an tlawh lai hian thawktu hmuh tur an awm lo. A panna kawng chu lirthei tê chi kal theihin kawng awm sa hnimba vel samfai a ni tawh a; a hmunhma turah hmalakna a la awm lo thung.

Horticulture College tur panna kawng awm sa chu a chhuk/chhoh lutuk avangin kawng thar, km. 1.350-a thui laih tura ruahman niin, chuta tan chuan cheng nuai 40 vel ruahman a ni a, mimal contractor-in April 25, 2016 aṭangin a thawk ṭan. Contractor hian khuain a zir loh avangin duh angin hna an thawk chak thei lo a, tun dinhmunah kawng chu 70% vel laih zawh a ni tawh.

Kawng laih viltu, Thenzawl PWD Sub-Division JE C Liankhuma chuan, khuain a zir a, hna thawh theih a nih chuan PWD-te'n an vil chin kawng laih chu chawlhkar hnih/khat velah thawh zawh theih an inbeisei tih a sawi.

Thenzawl Vengthara Horticulture College hmun tur ram hi hectare 120-a zau a ni a, ram ruak, vantlang ram leh mimal ram, a zatve tling lo hreta zau chu zangnadawmna phût loa khawtlang leh mi 10-in an pek a ni.

Thenzawl Vengthar VCP H Laldawngliana chuan, a thlawna ram petute chu sorkarin duh-sak theihna a awm a nih chuan duhsak thei se an duh thu a sawi.

Hetih lai hian, Horti-culture minister PC Lal--thanliana chuan, Thenzawla Horticulture College building tur chu sak thuai ni se a duh thu Union minister Radha Mohan Singh hnenah a lo thlen tawh a ni.