Remna Ni-a khuallian tura sawm Prime Minister a la chiang lo

Central YMA bultuma Remna Ni hman tura khuallian atana sâwm, prime minister Narendra Modi chuan a tel theih dawn leh dawn loh CYMA hruaitute a la hriattir lo.

CYMA president Lalbiakzuala hnen aṭanga thu dawn danin, khuallian atan hian Narendra Modi chu beiseina sang tak an nei a, a theih dawn loh chuan Governor Lt.Gen. Nirbhay Sharma khuallian a ni ang a, chief minister Lal Thanhawla khualzahawm a ni ang. Prime Minister a thei dawn a nih chuan Governor leh Chief Minister khualzahawm an ni thung ang.

Kumin Remna Ni hi Central YMA bultumin political party leh pawlte'n a hranpaa hmang loin a huhoa hman tura tih a ni a, a hmanna pui ber chu Lammualah neih a ni ang.

Central YMA chuan Remna Ni pualin Mizoram pumah remna leh muanna hlutzia uar taka tarlan ni se, an ti a; sorkar, tlawmngai pawl, political party leh kohhrante nen lungrual taka Remna Ni hman a nih theih nan YMA sub-headquarters leh group-ahte ruahmanna siam a ni.