Bairabi khaw mite leh Railways duty-te inep

June 18, 2016 zan dar 9 vel khan Bairabi rêl chawlhmunah Railways Protection Force (RPF) leh Bairabi khaw mite an inhmu thiam lo a, boruak sosang hman deuh mah se, nimin lamah chuan boruak a ziaawm tawha thu dawn a ni.

Bairabi aṭanga thu dawn danin, Inrinni zan dar 9 vel khan rel chawlhhmun bul hnaia khawsa Bobby Thangchhuahkima s/o Thanglianhnuna chuan rêl chawlhhmun platform-ah mei a zû a, chu chu Railways Police Force duty-te'n hmuin, mei zu lo turin an ti a, Bobby-a pawh chuan a paih ve nghal mai a ni. Mahse, RPF duty-te chuan kut an thlâk avangin, Bobby-a pawh chuan RPF mi pakhat chu kut a thlak zui niin an sawi.

RPF duty-te chuan platform-a thirsakawr khalh Lalremruata s/o Malsawmi pawh kut an thlak nia sawi a ni a; remna siam tum Bairabi tlangval dangte pawh RPF-te chuan kut an thlak bakah, rêl chawhmun bul hnaia cheng hmeichhia leh nunaute pawh kut an thlak niin an sawi. RPF duty-te'n kut an thlak zinga ṭhenkhat chuan hliam an tuar nia thudawn a ni.

Buaina thlenna hmun hi Bairabi police-te chuan an pan nghal a, RPF duty, mi kut thlaktute chu Police thana-ah an hruai a ni. Police-te chuan RPF mite chu lock-up ah khung tura an insawi laiin, zan reiah Railways Guest House-ah an hawtir a; chu chu mi ṭhenkhatte'n an lo hmuh avangin, Bairabi-a tlangval tam zawk inpunkhawmin, RPF duty-te chu kut an thlak ve ta niin an sawi. RPF duty-te chuan mipuite rîkrâp nan silaite an kaû a ni.

Bairabi-a buaina chhuak hi a hmuna enfiah turin Kolasib SDO(C) Mark Lalthanliana leh Kolasib addl. SP SK Hmar te chuan Pathianni khan Bairabi an tlawh a; Bairabi khawtlang leh Railways hotute kâwmin, inrem dan tur an sawipui.

Hetih lai hian, Railways lam chuan Silchar lama an hotute chahin, police station-ah FIR thehluh an tum a; Bairabi khaw mite pawhin Railways-in FIR an thehluh chuan FIR thehluh ve an tum a ni. Hei vang hian an inrem thei lo.

Nimin khan Kolasib DC-in Bairabi V/C-te leh YMA hruaitute leh Railways hotute a pisaa koin, inrem dan tur a sawipui a, an inrem thei nia thu dawn a ni. Railways hotute chuan, RPF duty-te'n an khawih hliamte inenkawlna senso tumsak an remti nia thu dawn a ni bawk.