MPC-in Kristianna humhim turin sorkar phût

MPC party office bearer-te an senior vice president Vanlalhlana hoa nimina an party pisaa ṭhukhawm chuan, Mizoram sorkar chu Mizote sakhua, Kristianna ngai pawimawh a, humhim ngam turin an phût.

MPC chuan resolution passs-in, Union Agriculture & Farmer Welfare minister Radha Mohan Singh-a'n June 19, 2016, Pathiannia Mizoram State Guest House-ah Mizoram sorkar official-te kokhawm a, sorkar thil pawimawh ngaihtuaha a ṭhutkhawmpui chu hriat-thiam harsa an tih thu a tarlang a; sorkar official-te zingah kohhrana mi pawimawh tak tak an awm tih sawiin, "Kristiante ni pawimawh leh serh bik zah lohna leh kohhrante palzûtna lian takah kan ngai," a ti.

MPC chuan, Mizoram tana thil
ṭha tur ngaihtuaha hmalakna chi reng reng an thlâwp rualin, Pathianni su buai zawnga hmalakna chu tih tawh loh ni se an duh thu an sawi a; "Mizoram sorkar hian kan sakhuana ni pawimawh humhim ngam tawh se la. Sorkar laipuiin Pathiannia programme an ruahman reng reng hnial ngam tawh turin Mizoram sorkar kan beisei a ni," an ti.

MPC party chuan, MZP sub-headquarters, Tlabungte'n West Tuipui bialah Mizo ngei candidate siam tura political party tin an ngen chu zahawm an tih thu an sawi a, "Political party dang zawng pawhin zawm thei se kan ti a ni," an ti a; kum 2018-a Legislative Assembly inthlan lo awm turah West Tuipui bialah Mizo ngei candidate-a dah an rel a ni.