Kuthnathawktute Ni hman a ni Mi thenkhatin NLUP an hêk Central-in explanation a call: Hawla
Nimin khan Mizoram district tinah Kuthnathawktute Ni hman a ni. Kuthnathawktute Ni hi Mizoram sorkar flagship programme NLUP hman ṭanna ni, January 14-ah kum 2011 aṭangin hman a ni a, Aizawlah chuan Synod Conference Centre-ah hman a ni. Khuallian, chief minister Lal Thanhawla chuan, mi ṭhenkhatin Central-ah NLUP an hêk avangin Central-in Mizoram sorkar chu NLUP chungchang sawifiah turin a ti niin a sawi.
Chief Minister chuan, an sorkar flagship programme NLUP chu mi ṭhenkhatin hlawhtling lo se an duh avangin sorkar laipuiah an hêk niin a sawi a, "Central-in explanation an rawn call a, sawifiahna kan thawn a ni. Mahse Pathianin malsawmna a thlen a nih avangin tuma'n an tihtawp ka ring lo," a ti.
Mi ṭhenkhatin NLUP chu party mite induhsakna hmanrua anga an sawi ṭhin chungchangah Lal Thanhawla chuan, Bible-ah pawh 'Huan neitu thawkrim chuan a rah ei hmasa rawh se,' tih a nih thu a sawi a, "Huan neitute chu sorkarna siamtute hi an ni. Huan neituten an ei hmasa hi a âwm ve tho a ni," a ti.
Chief Minister chuan Synod Social Front-in NLUP leh a dawngtute chungchang a zirchianna (social audit) ṭhenkhat a sawi lang a; NLUP dawngtu zinga 81.6% chuan hlawhtlinpui ngei an inbeisei tih sawiin, "98.3% chuan an thlai thar zawrhna (marketing)-ah harsatna neih an inring lo a, 98.3%-in NLUP hmangin eizawnna nghet an neih theih an beisei a ni," a ti.
CM Lal Thanhawla chuan, NLUP dawngtu 91.3%-in eizawnna dang an neih belh theih an inbeisei tih hmuhchhuah a nih thu a sawi a, 80.6%-in line department-te hmalak dan chu
ṭha tawk an tih niin a sawi bawk.
Lal Thanhawla chuan, Mizote chu Pathianin Chanchin Ṭha hril tura a kohte kan nih thu leh India ram chu chanchin ṭha chanchin ṭha kan hrilna tur hmun a nih thu a sawi a, "Pathianin independent min pek hma chuan lungawi taka India khua leh tuia kan awm a ngai," a ti.
CM Lal Thanhawla chuan, hlemhletna leh kuttling loa sum lak luh kawngah a fihlim tih sawiin, "Hlemhlêtnaah ka fihlim avangin a hun leh hun loah pawh ka sawi mai zel a ni," a ti a; sum ngainat chu sual tinreng bul a nih thu leh Mizote sum ngainatna bâwihah kan tlûk luh a hlauhthawn thu a sawi.
Mizorama maute ṭangkai zawka hman dan tur ngaihtuah a nih thu sawiin, Chief Minister chuan, mau hman ṭangkai dan tur zirtir turin Taiwan mite an chah mek niin a sawi a; Pathian malsawmna tawng baw turin rinawmna, dikna leh taimakna a ngai tih sawiin, NLUP ṭha taka a kal chuan Mizoram chu ei leh bara intodelh ram a nih thuai a beisei thu a sawi.
Lal Thanhawla chuan, kut hnathawktute tel loin khawi ram mah a kal thei lo tih sawiin, "Kut hnathawktute hi mi zahawm leh mi pawimawh an ni a, an puala ni hman hi an phu rêng a ni," a ti bawk.
Kuthnathawktute Ni-ah hian Agriculture minister leh NLUP nodal minister R Lalzirliana chu khualzahawm a ni a; thu sawiin, NLUP-in kum nga hmel a hmu ṭan mek tih a sawi a, kum 2015-6 aṭang chuan kal dan thara kal turin uluk taka ruahmanna siam mek a nih thu a sawi.
Agriculture minister chuan, Kuthnathawktute Ni hmannaa telte chu an nalh hlawm mah maha a hriat thu leh kut hnathawktu tak takte tel ve se a duh thu a sawi a, "NLUP dawngtu, a tak taka hna thawktute fuih thar nante hmang ta ila, kan hlawkpui zawk ang. District tinah hmang mah ila, district dangah pawh Aizawl ang bawka kan inko khawm a nih chuan, kut hnathawktu tak takte tel mang loa hman hi ka lo ui a ni," a ti.
Aizawla Kuthnathawktute Ni hmannaah hian Aizawla awm mek minister, parliamentary secretary, sorkar official-te leh NGO-te an tel a; NLUP Implementing Board chairman JH Rothuama, MLA leh chief secretary Lalmalsawma ten thu an sawi bawk. Chawhnu lamah seminar neih a ni a, Rev.Dr K Thanzauva leh Dr Robert S Halliday ten paper an present a ni.