Khawthlir

MP chawimawi
Khawlailung khaw­tlang chuan model village atana an khua puangtu, Lok Sahbha MP CL Ruala chu nimin khan an chawimawi. Chawimawina hun hi bial­tu MLA, Vanlal­awm­puii Chawngthu pawhin a hmanpui a ni.

MRB insawn
Mizoram Rural Bank (MRB), Treasury Square branch chuan Aizawl Press Club building-ah office an luah thar a, an office thar hi nimin khan Aizawl DC Dr Franklin Laltinkhuma'n a hawng.

Naupang su hlum
Nimin chawhma dar 11 vel khan Kawlkulh Hmarvengah 207 motor-in K Lalremruata (8) s/o Singremmawia, Kawlkulh a su a, K Lalremruata hi Kawlkulh damdawi-in panpui a nih laiin a hliam tuar loin a thi. Kawlkulh North branch YMA secretary Lalsangluaia Sailo sawi danin, motor khalhtu hi Lalmuanpuia Sailo s/o Lalchawienga Sailo, Kawlkulh a khalh a ni.

Heroin man
Excise & Narcotics department-a Anti-Narcotics Squad-te chuan nimin zing khawvar hma, dar 2:30 khan Zemabawka Forest checkgate bulah heroin gram 48 leh a neitua puh, Robert Lalhmachhuana (31) s/o H Manga, Kolasib Hmar Veng, tuna Ramhlun Veng­thara khawsa mek nia inchhál an man a, NDPS Act hnuaiah thubuai an siamsak.

Ph.D hmu thar
Lalhmingsangi d/o PC Lalvulliana chuan Mizoram University-a Psychology department aṭangin doctor of phillosophy a hmu thar a, a thesis chu, 'A comparetive study of psychological and adjustment among heterosexual and homosexual youth' tih a ni.

DIET workshop
Association of Mizoram DIET Employee (AMDE) buatsaihin nimin khan SCERT Auditorium-ah Faculty Workshop on In-service Teacher Education Curriculum buatsaih a ni a, School Education minister H Rohluna'n a hawng. Workshop chhunga zirtirtute'n anmahni subject ṭheuha rawtna leh sawihona an neihte chu MBSE-ah thlen tum a ni.