Vawiinah MLPC Act

Vawiin aṭangin zu zawrh theihna leh khuah­khirhna dan thar, Mizoram Liquor (Prohibition and Control) Act chu hman a ni dawn ta a, mahse zu zawrh nghal tur erawh a ni lo.

MLPC Act hman a nih dawn tak avangin, Excise & Narcotics department chuan nimin khan commissionerate conference hall-ah MLPC Act-in zu in leh in lo enfiahna atana hmanrua a tarlan, 'Breath analyser' hman dan zirhona an buatsaih a; MLPC Act kengkawhtu tur - police, traffic police leh Excise & Narcotics department officer-te an tel.

Training hi Excise & Narcotics commissioner Lalhmunsanga’n a hman­pui a; Police department, traffic police leh Excise & Narcotics department mite chu khawlaia zu in chunga lirthei khalhtute laka mipui himna tura ṭhahnemngai tak leh fimkhur taka dan kengkawh turin an inchah. Excise & Narcotics leh police station hrang hranga hman turin Breath Analyser pek chhuah nghal a ni.

MLPC Act hi vawi­inah hman ṭan ni dawn mah se, a kaihhnawih thil ṭulte peihfel vek a la ni lo a; END hotute chuan, MLPC Act hman ni mah se, licence/permit mumal taka pek chhuah a la nih loh avangin zu kaihhnawihah dan bawhchhiat a awl hle dawn tih an sawi a, mipuite chu fimkhur turin an chah a ni.