Dâwt thehdarhtu chhui mek

January 13, Thawh­lehni tlai thimhlim vel khan social media pa­khat, Whatsapp-ah Tuikhuahtlanga hmei­chhe pawngsual rawn anga thu thehdarh a awm a, hemi avang hian Tui­khuahtlang branch YMA chuan FIR an thehlut.

Tuikhuahtlang YMA hruaitute chuan FIR an thehluh chungchangah police nen an inbiakpawh reng thu an sawi a, "Tun dinhmunah chuan a thawn darhtu an la zawng chhuak lo a, police lam hian an bawhzui zel niin kan hria," an ti a; police lam pawhin chanchin ngaihven reng tura an hrilh thu Vanglaini an hrilh.

Whatsapp-ah thu thehdarh chu, 'Tun lawk khan Tuikhuahtlangah tlangval ṭhianho intiin nula pakhat an pawngsual rawn a... Hmeichhia hian a hlian tuar loin damdawi-in panpui a nih laiin a boral...Tlangval ṭhianho hi an tlanboa, tunah pahnih police kutah awmin, a dang an la zawng mek. An man pahnihte hian pasarih an nih thu police an hrilh,' tih a ni.

Thu thehdarh a nih hnuah Vanglaini pawhin police hotute thu an zawtfiah nghal a, police-te chuan an hriat loh thu leh thu dik lo a nih thu an sawi a ni.