Sun control bel lirthei an pung zel

Supreme Court-in lirthei darthlalanga sun control bel a khap leh Mizoram sorkarin lirthei darthlalangah sun control vel phal loh a nih thu hriattirna (notification) chu sût a la ni lo chungin, tunlai hian sun control inbel lirthei hmuh tur a awm nual.

Lirtheia sun control bel phal lohna thupek hi Mizoramah chuan kum 2012 laihâwl vel aṭangin hman a ni a, ram hruaitu minister-te leh mipuite'n ṭha takin an zâwm a; mahse tunlai hian lirthei darthlalanga sun control bel hmuh tur a awm nual a, chungzingah chuan minister ṭhenkhatte official car pawh a tel.

Lirthei ṭhenkhatin sun control an vuah leh tâk chungchanga zawhna chhangin, Transport secretary Hrangtawna chuan, Supreme Court thu kalhin Mizoram sorkarin lirthei darthlanga sun control bel phal a nih thu hriattirna a chhuah lo tih a sawi a; sun control bel tura phalna pek an neih loh thu leh, minister leh sorkar mi pawimawh ṭhenkhatin sun control an bel chu a hriatpui loh thu a sawi bawk.

Supreme Court thupek ang chuan, Governor, Chief Minister leh Home Minister-te chauh lirthei darthlalanga sun control bel phalsak an ni.

Hetih lai hian, sorkar mi pawi­mawhte ṭhutkhawmnaah lirtheia sun control bel chungchang an sawiho a; Supreme Court-in a khap chhan - mi firfiak leh helho tan chêt a awlsam phah tih leh lirthei chhungah sualna hrang hrang a punlun phah tihte chu Mizoramah a thlen ve ngai loh bakah, ni sa leh traffic jam-ah VIP-te tan sun control hman chu a ṭangkai avangin thutlukna siam chuang loin inhriatthiamnain an bel ta nia thu dawn a ni.

SAD-in minister personal branch aṭanga an pute (VIP) lirtheia sun control bel dilna an dawng ṭhin a, SAD hotute tan hnial a rem loh ṭhin avangin phalna an lo pe ṭhin nia thu dawn a ni bawk.

Sorkar mi pawimawhte lirthei ni lo, private motor-ah pawh sun control inbel hmuh tur a awm leh ṭan ta a; lirthei neitu tam takin Mizoram ang hmun ralmuanga sun control bel phal lohna dan hman ve kher hi hnawksak an ti hle.

Hetihlai hian lirtheia sun control bel phal tawh lohna thupek hian India ramah zawm a hlawh vek lem lo a, New Delhi vela an zawm ṭhat viaulaiin khawpui lian dangah pawh sun control inbel lirthei hmuh tur hi a la tam hle a ni.