Chawlh puan hun inan loh vangin Sikul naupangten harsatna tawk

Islam sakhaw hotu, Muhammad-a pian ni (Mulad Un Nabi), national holiday-a puan ṭhin chu School Education department chuan hre sualin January 14, 2015 angin an ngai a, sikul ṭhenkhat an chawlhlaiin sikul ṭhenkhat an kai a, a ṭhen sikul an kai hnuah an haw leh a, zirlaite'n harsatna an tawk.

Mulad Un Nabi hi kum 2014 Mizoram Calendar 2014-ah January 14 tih a ni a, kum 2015 Mizoram Calendar 2015-ah chuan January 4 tih a ni.

Chawlh an hriat sual chhan Vanglaini palai zawhna chhangin School Education department hotute chuan, school calendar chu kum 2014 Mizoram Calendar en mila siam a nih thu an sawi a, "April, 2014 khan sorkar chuan notification tichhuakin kum 2014-a Mizoram Calendar-a inziak angin school calendar hi kan hmang zui a ni. Mizoram Calendar-ah Mulad Un Nabi hi January 4 tih ni leh mah se, sorkarin notification a chhuah hi kan ring tlang a ni," an ti.

Mizoram Calendar buatsaihtu I&PR department hotute chuan Vanglaini palai zawhna chhangin, calendar an buatsaiha holiday an tarlante chu General Administration Department (GAD)-in holiday atana an puan anga siam ṭhin an nih thu an sawi.

Milan Un Nabi hi January 4-a hman ṭhin a ni.