District tinah Kuthnathawktute Ni hmang

Nimin khan Mizorama district khawpui hrang hrangah Kuthnathawktute Ni hman a ni a, sorkar hotute'n an hmanpui.

Lungleiah chuan Saikut Hall-ah hman a ni a, Lunglei DC Ashish Madhaorao More-in kaihruaiin, LAD minister PC Lalthanliana khuallian a ni. PC Lalthanliana chuan, "Zoram politics leh ram kalphung siamṭhatna kawngah kuthnnathawktute pawimawhzia sorkarin a hria a, anmahni chawi kânna turin NLUP hi duan a ni. Kuthnathawktute hian awmze nei zawka ram hmasawnna zel turah dinhmun leh aw an neih ve theih nan sorkarin a duhsak tak zet a ni," a ti.

Kuthnathawktute Ni hmannaah hian Lunglei dis­trict-a khaw 187 aṭanga NLUP ṭanpuina dawng tur mi 920 hnenah Agriculture, Soil & Water Conservation, Horticulture, AH&Vety leh Sericulture department hnuaiah ṭanpuina pek a ni.

Serchhipah chuan State Planning Board vice chairman H Liansailova hoin DC conference hall-ah hman a ni. H Liansailova chuan, Mizoram sorkarin kuthnathawktute pawimawhna leh harsatna an tawhte a hriat chian avangin an dinhmun sawhngheh a, eizawnna ngêlnghet an neih theihna kawng dap chu a thupui ber a nih thu a sawi.

H Liansailova chuan, NLUP chuan ei leh bar intodelhna te, ramngaw leh tuihna humhalh te, sik leh sá chhe zel tur venhim te, mihring khawsakna ngêlnghet neihte a ken tel vek avangin ngaihthah chi a ni loh loh thu a sawi a, "Politics-a inchirhthehna atana hman leh sawihnâwm a ni ṭhin hi hriat chian loh vang a ni ang," a ti.

Mamitah chuan LAD con­ference hall-ah hman a ni a, Mamit DC K Lalthawmmawia khual­lian a ni. DC chuan, Mizorama chêng tam zawkte chu kut hna thawk an nih thu sawiin, "Dinhmun ngelnghet taka kan din loh chuan ram hmasawnna a rualkhai thei ṭhin lo. Kuthnathawktute dinhmun ngelngheh nan NLUP din a ni," a ti.

Kuthnathawktute Ni hi Saiha-ah chuan MADC CEM, RT Zachono hoin DC office kawtah hman a ni a; Saiha khawpui chhunga kut hna thawk entawntlak pathum - K Sawma, Lalsavuta leh Kailasha hnen Rs. 2,000 ṭheuh hlan a ni. RT Zachono chuan, taimakna, tumruhna, chhelna leh huaisenna nen theihtawp chhuaha hlawhtlin tum turin kut hnathawktute a chah.

Champhaiah chuan addl DC R Vanlalsawta hoin DC conference hall-ah hman a ni a; R Vanlalsawta chuan, kuthnathawktute chawi­mawina hun bik ruat chu thil âwm reng a nih thu sawiin, kum thar a nih angin inpekna thar nen thawk tlang turin kalkhawmte a sawm a ni.

Lawngtlaiah chuan DC J Hmingthanmawia kaihhruaiin DC conference hall-ah hman a ni a, LADC CEM V Zirsanga khuallian a ni. V Zirsanga chuan, Lawngtlai district mipuite chu ei raltu ni lo a, thawk chhuaktu nih zawk tum turin a fuih a, "Mi taima, thawhchhuah tum tak tak tan chuan kawng zau taka hawnin a awm reng a, hmanrua pawh kan nei ṭha tawh a ni," a ti.