Gas agent-te dan kalha thil ti-ah puh

Mizoram Consumers Union (MCU) chuan thuchhuah siamin, sorkar laipui ruahmanna anga eirawngbawlna gas lak dana kalphung thar, Direct Benefit Transfer for LPG (DBTL) kalpui ṭan mekah gas distributor tam takin dik lo takin mipuite aṭangin sum an la niin an tarlang.

MCU chuan, sorkar thuchhuak angin gas distributor-te'n DBTL tih nan form fil-up man, processing fee, administrative charge leh thil dang atan consumer-te aṭangin pawisa lak a thiang lo tih an sawi a, "Gas agent-te'n consumer-te chu a thlawnin an buaipui vek tur a ni," an ti.

MCU chuan, mitthi vanga hming thlak te, hming ziah ṭhat ngai, hnam hming dah leh dah loh avanga siamṭhat ngaiahte Indian Oil Corporation declaration form hmangin distributor-te'n an lo fill-up tur a ni tih sawiin, "Form man Rs. 5 bâk chawi a ngai lo. Chhungkaw pakhat tan subsidised consumer card pakhat bâk hman phal a ni lo a, consumer card dang chu non-subsidised atan hman phal a ni," an ti.

MCU tarlan danin, Ministry of Petroleum thuchhuak angin, mi pakhatin consumer card 2/3 emaw, chhungkaw pakhatah consumer card pakhat aia tam an lo neih pawhin, non-subsidised category-ah dah tur a ni a; gas distributor ṭhenkhatin consumer-te chu subsidy-a card 2/3 nei turin an fuih a, ration card 2/3 siam tura hmalaknate a awma hriat a ni. Hetiang hi dan kalh a nih avangin, MCU chuan mipuite fimkhur tur leh dik taka ti turin a ngen a ni.

DBTL tihna tura thil an tihnaah, dan loa thil ti an awm chuan sorkar leh MCU-a hriattir zel turin an ngen bawk.