Lokayukta kut phuar a ni - MPCC; Kut phuarna phelh turin CM an ngen

Mizoram sorkarin Lokayukta kut a phuar nia puhin Mizoram Pradesh Congress Committee (MPCC) chuan nimin khan Lokayukta kut phuarna phelh tura ngenna chief minister Lalduhoma hnenah ziakin an thlen a; CM private secretary Lalrinawma Khiangte hnenah an thehlut.

MPCC hruaitute chuan nimin khan Aizawl Press Club-ah thuthar thehdarhtute an kâwm a; MPCC senior vice president Lalnunmawia Chuaungo chuan, ZPM-in inthlan hmain Lokayukta an thuam chak tur thu an sawi ṭhin thu sawiin, "Amaherawhchu, thuam chak aiin hna thawk tak tak thei lo turin a kut an phuarsak ta zawk a ni," a ti.

Lalnunmawia Chuaungo chuan, ZPM sorkar hmalaknain The Mizoram Lokayukta (Amendment) Act, 2024 pawm a nih thu sawiin, "Hman turin March 15, 2024-ah gazette notification chhuah a ni," a ti a; dan tih danglam chuan Lokayukta pawimawhna a tihniam a, hna thawk tak tak thei lo turin a siam niin a sawi.

Lokayukta-in hnu a chhuina leh court-a thubuai a ngaihtuahna hotu ber tur inquiry wing leh prosecution wing-a an hotu ber chief inquiry officer leh public prosecutor-te dinhmun tihhniam a nia sawiin Lalnunmawia chuan, "Additional level aṭangin deputy secretary level-ah tihhniam a ni," a ti.

Chief Minister thlenga chhui thei tur Lokayukta-a hnu chhui hna hotu ber dinhmun tihhniam a nih avangin mi ṭha hmuh a harsat phah tur thu sawiin Lalnunmawia Chhaungo chuan, "Heng post pawimawh tak takte status leh level tihhniam hi Lokayukta pawimawhna tihnêpna a ni," a ti a, dan siamṭha leh turin sorkar a ngen.

Lalnunmawia chuan, dan tihdanglamah chuan Lokayukta-in pawl (authority/ organisation) hnuaia thawkte chungchang court-a a thlen dawnin pawl thuneitute phalna lak hmasak a ngai tawh tih sawiin, "Pawl hotute hian remtihna pe duh lo ta se, Lokayukta hian engmah a ti thei dawn lo tihna a ni," a ti.

MPCC Senior Vice President chuan, Mizoram Lokayukta Act, 2014-ah chuan eirukna chhuitu (investigation agency) dangte thuneihna Lokayukta kutah hlan vek tawh a nih thu sawiin, "Dan tihdanglamah chuan Lokayukta thuneihna chu agency dangte hnenah pawh hlan tel ve a ni," a ti a, chu chu Lokayukta siam a nih chhan tihbawrhbànnaa an ngaih thu a sawi.

Agency dangte kuta eirûkna chhui theih tura dah chu CBI tana hun ṭha pekna a nih theih leh theih loh zawhna chhangin Lalnunmawia chuan, "A nih a rinawm loh, CBI an hlau em mai. CBI-in an chhui dawna state phalna lak ngai kher an tih danah hian an thunun theih ACB lam kawng an hawnsakna a ni ang," a ti.

MPCC TARLAN DANGTE

■ Dan tihdanglam hi Lokayukta-in inves­tigation chungchanga thuneihna a neih leh eng agency pawh inquiry ti tura a hman theihna chhuhsakna, Lokayukta hna thawk thei loa siam a, state sorkar remtihna la hmasa loa engmah ti thei loa siamna leh Lokayukta kut phuarsakna hmanrua a ni.

■ Lokayukta hian sorkara innghat loa zalen taka hna a thawh theih nan a mamawh ang officer leh staff pe vat tur leh, kum 2021-a state sorkarin ACB aṭanga post 25 Lokayukta-a transfer tura thutlukna a lo siam tawh hi a taka chantir nghal kan phût.

■ Dik leh thulai la taka investigation ti thei turin investigation wing atan officer leh staff a ṭul ang zel pek belh a, thuam chak vat kan duh.

■ Lokayukta-in a mamawh dana ama puala officer leh staff a neih theih nan recruitment rules rang taka siam.