Criminal law thar chanchinbumite zirtir
Aizawl SP Office chuan nimin khan an conference hall-ah thuthar thehdarhtute pualin dan bawhchhiate hremna dan (criminal law) thar pathum zirhona an buatsaih a, Aizawl SP Rahul Alwal-a'n a hmanpui.
Zirhonaah hian criminal law thar pathum - Bharatiya Nyaya Sanhita, 2023 (IPC 1860 thlaktu) te, Bharatiya Nagarik Suraksha Sanhita, 2023 (CrPC 1973 thlaktu) leh Bharatiya Sakshya Adhiniyam, 2023 (Indian Evidence Act 1872 thlaktu)-te zirho a ni.
Police Headquarters-a deputy SP Jessica Lallawmzuali leh All Women Police Station, Aizawla officer in-charge inspector Lalsangpuii ten thil pawimawhte an sawifiah a; sawihona leh zawhna leh chhanna hun hman a ni.
ZIRHONAA SAWI LAN ṬHENKHAT
▶ India ram khawi hmuna thil thleng pawh ni se, khawi police station-ah pawh FIR thehluh theih a ni.
▶ Online-in FIR thehluh theih a ni a, mahse, ni thum chhungin police station-ah hming ziah a ngai.
▶ Thubuaia tuartu (victim) hnenah FIR copy pek ngei ngei a ngai tawh.
▶ FIR a luh chuan thubuai ziah luh ngei ngei tur a ni a; ziah luh a nih loh chuan police hotu sang zawk bakah, magistrate hnen thlengin zualko theih a ni.
▶ Thil sual tite hremna atan vantlang hna thawka (community service) inhremna chi ruk a awm.
▶ Vantlang hna thawk tura hrem theihnate:
i) Dan loa sumdawnnaa inhnamhnawih sorkar hnathawk.
ii) Court-a inlan duh lo.
iii) Mahni intihhlum tum.
iv) Sorkar hnathawk hna a thawk tur dan leh tihbuai.
v) Intihhmingchhiatna.
vi) Vantlang hmuna zu rûi.
▶ Mahni duh thua mipat hmeichhiatna hmang thei chin kum bithliah - kum 15 ni ṭhin chu kum 18-ah tihsan a ni.
▶ Kumtlinglo pawngsual rawn (gangrape) china ngaih kum 12 chin ni ṭhin chu kum 18-ah tihsan a ni.
▶ Police-in thuhretu atana thu an zawhfiahnaah natna benvawn nei te, kum 65 aia upa leh kum 15 aia naupangte chu police station-ah koh theih a ni tawh lo a, an awmnaah pan a ngai tawh. Anmahniin PS-a kal an duh zawk chuan kal theih tho a ni.