Thla 6 chhungin heroin kg. 30.660, zu lt. 34,096.94 leh ûm 15,226 man

Excise & Narcotics department (END) chuan nimin khan an commi­ssionerate conference hall-ah July 1, 2024-a hman ṭan, thil sual tite hremna dan thar pathum an zirho.

END hian 2024 kum chanve chhungin zu lt. 34,096.94 leh ûm 15,226 leh, heroin kg. 30.660 an man.

Dan zirhona hi END joint commissioner Peter Zohmingthanga'n a kaihruai a, END commissioner Z Lalhmangaiha'n thu a sawi. Mizoram hmun hrang hranga END hotute an tel a; Special Court (Prevention of Corruption Act) judge Dr HTC Lalrinchhana'n dan thar pathum chungchanga thil pawimawhte a hrilhfiah.

Criminal law thar pathum - Bharatiya Nagarik Suraksha Sanhita, 2023 (CrPC 1973 thlaktu), Bharatiya Sakshya Adhiniyam, 2023 (Indian Evidence Act 1872 thlaktu) leh Bharatiya Nyaya Sanhita, 2023 (IPC 1860 thlaktu)-te zirho a ni.

END tarlan danin, kumin January 1 aṭanga June 30 thleng khan END-in zu litre 34,096.94 leh ûm 15,226 an man a; heroin (no. 4) kg 30.660 leh methamphetamine kg. 112.528 an man bawk.

Kum chanve chhungin END-in rakzu lt. 32,818.140 an man a, sapzu ûm 15,226 leh Myanmar zu (BEDC) lt. 1,278.800 an man. Sapzu an mante chu India rama siam (Indian made foreign liquor) ûm 15,063 leh ram dang siam (foreign made liquor) ûm 153 a ni.