KHAWTHLIR

Session ko

Governor Dr Hari Babu Kambhampati chuan Mizoram State Legislative Assembly pakuana session vawi thumna chu August 20, 2024 chawhma dar 10:30-a ṭan turin a ko. Session hun chhung tur leh hun hman dan turte chu Assembly Business Advisory Committee-in an ngaihtuah ang.

Missionary retreat

Synod Mission Board buatsaihin nizan khan Bawngkawn Presbyterian Kohhranah North East Region Missionary Retreat vawi 5-na ṭan a ni a, July 14, 2024 (Pathianni) zanah a ṭiak ang. Missionary Retreat-ah hian India hmarchhak biala mission field pasarih aṭangin missionary 700 chuang leh an chhungte nen mi 1,600 vel beisei a ni a, thupui chu 'Chanchin ṭha hril' tih a ni.

Dawr enfiah

Serchhip District Task Force on Child and Adolescent Labour chuan nimin khan Serchhip khawpuia dawr, thingpui dawr, hotel leh workshop-te an tlawh a, dan kalha naupang chhawr luihna (child labour) a awm leh awm loh an enfiah.

DC-in pawl kâwm

Lunglei district deputy commissioner (bawrhsap) thar R Lalṭhazuala chuan nimin khan a pisaah Lunglei district MJA, Lunglei Village Council Association, Lungleia Sub-Hqrs YMA, Sub-Hqrs MHIP leh Mizoram Upa Pawl (MUP) hruaitute a kâwm a; district kaihhnawih thil chi hrang hrang sawipuiin, thawhhopuiah a sâwm.

Lehkhabu hlân

INTACH Mizoram Chapter chuan sorkar, kohhran leh zirna-ina archive/library-a dah turin Art & Culture minister C Lalsawivunga hnenah nimin khan JH Lorrain (Pu Buanga) lehkhathawn leh sûlhnu pawimawhte dahna lehkhabu pali an siamte an hlan. Lehkhabute chu nimin vek khan Mizoram State Archive, Tribal Research Institute, Mizo Language Development Board, Mizoram Legislative Assembly, Mizoram University Library, Synod Archive, Baptist Church leh Aizawl Theological College hnenah hlan a ni.