Geneva-a UN hnuaia tualṭo hnamte inkhawmpuiah ZORO aiawhte an tel

July 8, 2024 aṭang khan Geneva, Switzerland-ah UN Expert Mechanism on the Rights of Indigenous Peoples session vawi 17-na neih a ni a, vawiin thleng neih tur a ni. Inkhawmpuiah hian Zo Reunification Organisation (ZORO) aiawhin mi pathum an tel a, Mizorama ráltlânte chungchang an sawi lang.

Inkhawmpui hi tualṭo hnamte puala intawhkhawmna a ni a; ZORO pawhin UNO hnuaia tualṭo hnamte inziah luhna UN Permanent Forum for Indigenous Issues (UNFPII)-a affilliated member a nih angin aiawh pathum - ZORO Western Zone president Lalnunfela Chawngthu, KH Vanlalruati, Serchhip leh Switzerland-a ZORO consultant Lalruatpuii Cira te an tel. July 10 khan ZORO chu thu sawina hun pek a ni.

ZORO aiawha thu sawitu Lalnunfela Chawngthu chuan, February 2023 aṭanga Manipur-a Mizote'n buaina an tawh chungchangah, "Manipur-a Zo fate chu pi leh pu aṭanga an lo luah tawh an in leh lo aṭangin ûm chhuah an ni a, an in mai bakah biak-inte hal a ni. An buaina hian ziaawm lam a pan thei lo," a ti a; sahimna zawnga mangang taka vâkvai mi sang têlte chu Mizoramin a lo dawngsawng mek tih a sawi.

Bangladesh leh Myanmar-a Mizote harsatna an tawk tih sawiin Lalnunfela chuan, "Bangladesh-a Chittagong Hill Tract buaina avangin mi tam takin Mizoramah sahimna an rawn zawng a, mahse, Border Security Force (BSF)-te'n Mizorama an luh phal loin an lo hnawt kir leh ṭhin. Tunah hian Zo fa tam tak chu ramhnuaiah ei tur mumal nei loin an vâkvai mek a ni," a ti.

Lalnunfela Chawngthu chuan, India chu UNDRIP-a hming ziaktu a ni chungin Myanmar nena zalen taka inkalpawh tawn theihna Free Regime Movement (FMR) tihtawp a tum thu leh ramri hung a tum thu a sawi a, "Zo fate hi Bangladesh, India leh Myanmar-a cheng kan ni. Kil tin aṭangin nêkchêpin kan awm mek," tiin, Mizote dinhmun a chhiat tial tial thu a sawi.

ZORO palai chuan, Mizote chu mahnia ro an inrêl ve hun a thlen ngei an beisei thu sawiin, "Mahnia ro kan inrel ve theih nan UNO thlawpna kan mamawh a, min thlawp turin kan beisei a ni," a ti.