Lungleiah Cyber Cell hawn a ni

Lunglei district-a cyber crime leh information technology kaihhnawih thubuai buaipuitu atan Lunglei Police Station-ah Cyber Cell din thar a ni a, nimin khan DIG (Southern Range) C Lalthanmawia'n a hawng.

Cyber Cell hi Lunglei District Executive Force hnuaia din a ni a; C Lalthanmawia chuan, Lungleiah Cyber Cell din a ni ta chu lawmawm a tih thu sawiin, "District dangah hetiang room hran thlap neia mumal taka cyber cell din a awm ka hre lo," a ti a, Lunglei SP hmalakna fakawm a tih thu a sawi.

Lunglei SP J Lalmuankima pawhin thu sawiin, "Lunglei district chhunga hetiang lama harsatna neite an harsatna sutkianpui kawnga a bik taka thawk turin Cyber Cell hi din a ni," a ti.

Cyber Cell-ah hian cyber crime thubuai bakah, portal hrang hrang - CEIR, ICJS, ITSSO, CriMAC, NIDAAN, CyTrain, NDSO leh NAFIS-te enkawl a ni dawn a; investigating officer-te'n CDR an dilte pawh an mamawh ang zelin awmze nei zawkin an lo enfiah ṭhin dawn a ni.