Rural Monitoring & Information System kalpuina tur hmanrua minister-in a sem

Rural Development minister Prof. Lalnilawma chuan nimin khan RD conference hall-ah North Eastern Council (NEC) hnuaia RD office hrang hrangte thlun zawmna - Rural Monitoring & Information System (RMIS) kalpuina tur computer leh hmanraw dangte a sem.

Prof. Lalnilawma chuan, RMIS chu ṭangkai tak leh a nih dan tur ang taka hman a nih theih nan a hman dan zir thiam tum turin thawktute a chah a, "Kan department hi thingtlang khawsak dinhmun chawikan leh tihhmasawn hna thawktu a nih angin Mizorama khaw hrang hranga harsatna awmte zir chiang turin in awm kual tam a pawimawh," a ti.

RMIS project hian RD department secretariat, directorate, DRDO office 11 leh RD block office 28-te tan computer 55 leh a kaihhnawih hmanrua dangte a huam a; bungruate chu RD Minister-in RD department secretariat, directorate, DRDO office 11 leh RD block office 28 aiawhte hnenah a hlan a ni.

RMIS project hi cheng nuai 249 hû a ni a, NEC aṭangin first instalment leh second instalment atan nuai 200.096 hmuh tawh niin, hmuh tur cheng nuai 48.904 a la awm. Project-in a tum chu - RD department hnuaia office hrang hrangte software application hmanga thlun zawm a ni.