MLA-in Lunglei DIET jubilee a hmanpui

Lunglei High Powered Committee (HPC) vice chairman V Malsawmtluanga, MLA chuan nimin khan Lunglei District Institute of Education and Training (DIET) golden lubilee lawmna a hmanpui a; sorkarin sum a khawl hmangin tun hnaiah casual teacher ṭhahnem tak lâk a nih thu a sawi.

V Malsawmtluanga chuan, DIET, Lungleiin golden jubilee an thleng chu a lawmpui thu a sawi a, "HPC fund chhuak leh hmasaah DIET, Lungleiin an mamawh eng emaw tak tihsak kan tum. Mizoram sorkarin kum 2024-25 hi insawh ngheh kumah puangin, a theih ang anga inrenchem turin hma a la a, chumi zarah chuan sorkar pawhin sum khawlin, tun hnaiah casual teacher eng emaw zat a lak theih phah a ni," a ti.

April 2024-ah GST aṭanga Mizoram sorkar sum hmuh 52%-a a pun thu sawiin Malsawmtluanga chuan, "India ramah a sang ber kan ni a, state sum leh pai dinhmun pawhin hma a sawn zel. Zirtirtu indaih lohna a nasat avangin a ṭul angin zirtirtu pawh lak belh zel tum a ni a, zirtirtu lak leh dah nghehah kalphung felfai tak ruahman a nih bakah, zirtirtute rualkhai taka an thawhna hmun siam tum a ni," a ti a; insawipui a awm loh nan mipui ṭawiawmna an mamawh thu a sawi.

Lunglei DIET golden jubilee lawmna pual hian chawhma dar 10-ah jubilee dar vuak a ni a, HPC Vice Chairman-in kum 50 tlin hriatrengna lungphun a hawng a, tlaiah jubilee lawmna ruai ṭheh a ni.

DIET, Lunglei hi September 28, 1974 khan Under Graduate Teachers' Training Institute (UGTTI) tia din a ni a, July 4, 1980-ah Teacher Training Institute (TTI) tia thlak niin, February 4, 1993-ah DIET tia thlak a ni. Lunglei DIET-ah hian zirtirtu 15 leh non-teaching staff 15 an awm mek a ni.