Râltlân kan dàwl zawh tâwk hriat a ṭul - Lawngtlai DC

Lawngtlai DC Cheemala Siva Gopal Reddy kaihhruaiin nimin khan a pisaah sorkar hotute leh Central YLA, LWA, MHIP, MUP aiawhte'n Lawngtlai district-a raltlante leh an ni tin mamawh chungchang an sawiho. DC chuan, raltlan an luh tamk lutuk chuan an dâwl zo dawn lo a, an dàwl zawh tâwk hriat a ṭul thu a sawi.

Cheemala Siva Gopal Reddy chuan, Myanmar leh Bangladesh ram buai vanga Lawngtlai district-a raltlan lutte chu a theih chin chinah ṭanpui an nih thu a sawi a, "NGO-te pawhin theihtawp in chhuah a, fimkhur taka hmalak a ṭul. Ram leilung fate him leh zalen taka an awm hi thil pawimawh hmasa a ni a, raltlan awm mekte nawr chhuah tumna a awm lo. A hranpaa sorkar aṭanga raltlan ṭanpuina a awm loh avangin raltlan tam zawk lo lut turte kan dâwl zo dawn lo a, kan dàwl zawh tawk hriat a ṭul," a ti.

Myanmar-a Rakhine state mi leh sa Lawngtlaiah an awm tih thâwm a hriat thu sawiin Bawrhsap chuan, "Assam Rifles nen an inkâwm tawh a, khauh zawka ramri venghim turin hma lak mek zel a ni a, police patrolling pawh zing leh khauh zawka kalpui a ni," a ti a; NGO-te ngenna anga security check post tam zawk siam turin thuneitu sang zawk hnenah thlen a nih tur thu a sawi.

Bawrhsap chuan, mipui ni tin mamawh phur lirtheite'n an kalna tur hmun an thlen ngei a pawimawh thu sawiin, "YLA hminga pawisa khawn duh vanga lirthei dang ṭhin an awma hriat a ni a, hei hian YLA hming a tichhe thei. Pawisa khawn chíngte zawng chhuak a, a ṭul anga hma min lakpui turin CYLA-te ka sawm a ni," a ti.

CYLA hruaitute chuan, dan loa sumdawnna a awm avangin tuialhthei phur (tanker) dan a nih thu leh mipui tana harsatna thlen tumna a awm loh thu an sawi a; bungraw phur motor bikah dan phal loh phur an awm leh awm loh an endik ṭhin thu leh dan ang thlapa bungraw phurte an dan ngai loh thu an sawi bawk.

NGO-IN DC AN NGENTE

* Lawngtlai district mipuiin hnianghnar taka tuialhthei an neih nan tuialhthei dinhmun enfiah.

* Rakhine mi leh sa Lawngtlai district-a lut-chhuakte felfai taka chhinchhiah.

* Lawngtlaia hotel neite'n identity card nung an phût zelna tura hmalak.

* Bâwm raltlan Lawngtlai district-a lutte nawr lêt loh.

* Lawngtlai district mipui him zawk nan thingtlang lama security check post leh temporary beat post dah tura hmalak.