Social media hman sual Home Minister-in a vei

Home minister R Lalzirliana chuan nimin khan Aizawl Press Club-ah thuthar thehdarhtute kawmin, Mizoramah social media hman khawlohna a hluar chu pawi a tih takzet thu sawiin, "Social media hmangsualte hi dan hmanga na taka hrem theih an ni," a ti. Kum 1999 aṭang khan social media hmangsual chungchangah police-in chargesheet pasarih Court-ah an thehlut tawh.

Midangte tana pawi tur a nih leh ni loh leh, dan bawhchhiatna a nih leh nih loh pawh ngaihtuah loin thil thleng danglam hlek kan hriat apiang a dik leh dik loh pawh fiah hman lohin kan vawrh darh ṭhin thu sawiin R Lalzirliana chuan, "Eng thu mai pawh hi vahchap kang ang maiin a darh chak a ni," a ti.
Home Minister sawi danin, lirthei accident-a hliam tuar thlalak te, ruang chhar an awm dan ang anga an thlalak thawn darh te, thuthang a dik leh dik loh finfiah miah loa thawn chhawnte leh mimal chanchin a chhe zawnga vawrh darh etc. chu IT Act leh dan dang hmanga hrem theih vek a ni.
R Lalzirliana chuan thu thawndarh chak lutuk chuan police investigation a tibuai a, ṭul loa mipui rilru a hruai sual bakah dan leh thupek a tihbuai theih thu sawiin, Mizo mipuite chu social media hmanga thu an thawn darh dawnin, nghawng pawi theih tur a nei nge nei lo tih ngaihtuah hmasa ṭhin turin a chah.
Zira chuan Facebook-ah mahni nihna dik tak tilang ngam loa, hming lem hmanga midang chanchin a chhe zawnga vawrh darh a, sorkar hotute hlemhletna finfiah lohte vawrh darh duhte an awm thu sawiin, "Heng titute hian chhui chhuah theih loh emaw an inti ṭhin a, mahse chhui chhuah theih vek a ni," a ti.
Zawhna chhangin Home Minis­ter ṭawiawmtu IGP Zorammawia chuan, social media hmanga danin a phal loh thawndarhtu chu FIR a luh kher loh pawhin police-in an chhui theih thu a sawi a; hetihlai hian Police-in mahni thua an chhui hi chuan Court-ah chak loh palh a awm ṭhin a, chuvangin a tuartute ngeiin FIR an thehluh chu duhthusam a nih thu a sawi.
Zorammawia sawi danin, kum 1999 aṭanga 2014 thleng khan Mizoram police-in information technology hman dik loh chungchangah thubuai 50 an ziak lut tawh. Thubuai 50 zinga serious deuha hriat 17 chu SP CID (Crime) hnenah hlan chhawn a ni a, heng zinga pasarihah hian Court-ah chargesheet thehluh a ni. Thubuai pakhat chu thu tling loa ngaih a ni a, pariat chu chhui zui mek a ni.
Home Minister hi IGP bakah hian parliamentary secretary (Home) Col. ZS Zuala leh Aizawl SP C Laldina ten an ṭawimawm a ni.