Mizoram kawng vil uluk turin Minister-in engineer-te a chah

Minister Lal Thanzara chuan contract hna viltu engineer-te an chak tawk loh thu sawiin, "Nasa taka ṭan an lak a ṭul a ni," a ti.

PWD engineer leh PMGSY kawng laitute nimina Assembly Annexe conference hall-a an inhmuhkhawmnaah thu sawiin PWD enkawlnaa Chief Minister puitu Lal Thanzara chuan, "India rama state kilkhawr berte zinga mi kan nih vang te, state naupang tê kan nih avangte leh kum 20 chhung zet rambuai kan nih avangte hian Mizoramah hian kawngpui kan nei chau hle a ni," a ti.

Lal Thanzara sawi danin, tun dinhmunah Mizoramah hian kawng kms. 7548-a thui a awm a, Mizoram zau zawng aṭanga chhûtin kawngpui neihte hi sq.kms 100 zelah kawng km 35.80-a sei nei ang a ni. Mizoram kawng neih zingah Mizoram PWD kawng bik chu kms 5870-a thui a ni a, a bak zawng chu BRO leh department dang enkawl a ni.

Kawng ṭha neihah hmasawnna a innghah thu sawiin Lal Thanzara chuan, "Kawng ṭha hi rohlu a nih avangin PWD leh contractor-te mawhphurhna a sang hle a ni. Hetianga thui kawng enkawl tur hian kum 2014-2015 chhung hian non plan-ah cheng nuai 3550.00 leh plan-ah cheng nuai 184.00 a awm. Hei hi Rs.0.76 lakh per km niin, kawng ṭha taka enkawl tur chuan a beitham hle a n," a ti.

Lal Thanzara chuan PMGSY-ah hna a ṭhat tawk loh thu sawiin, "Kawng thar han siam tura sum hmuh hi a harsa tak meuh meuh a, kan sum hmuh ṭhatna ber PMGSY-ah lah hian kan achievement a ṭhat tawk loh avangin sanction thar neih a harsa ṭan hle," a ti a, PWD engineer leh contractor-te chu nasa lehzual ṭan la turin a chah.