Sum renchem dan ngaihtuah

Chief minister Lal Thanhawla hoin nimin khan CMO conference room-ah minister, parliamentary secretary-te leh MLA ten sum renchem dan tur chungchang an sawiho.

Lal Thanhawla chuan sum renchem dan tur leh sum tam zawk lakluh dan tur ngaihtuah a ṭul thu sawiin, "Heng thil pahnihah hian thutlukna khauh tak lak a ngaihna laite a awm thei a ni. Sum lama harsatna hi Indian economy tlakhniam aṭang khan ngai a la awh tak tak thei lo," a ti.

Buhfai man tihsan chungchangah Chief Minister chuan, "India pumah Mizoram chu buhfai man tlawm berna a ni. Tihsan thut a ni lo a, a man tur ang kan inpektir mai a ni zawk," a ti a, sum renchemna atan buhfaiah VIP quota pawh tihtawp a nih thu a sawi.

Meeting-ah hian sum sen tlem zawk nan leh bungraw ṭha lei theih nan department tin ten ‘C’ form hmangin bungrua lei ni se tih te, sorkarin mimal in luah loh theih dan dap se tih te, bungraw lei chungchangah write off tur leh mamawh aia tam lei loh te, Comptroller & Auditor General of India observations ngaih pawimawh te, department dangte mamawh dan azira department ram hman phaltir te, medical reimbursement dan ennawnte leh sorkar motor hmanna ennawn chungchangte an sawiho a ni.