Mizoramah voter 7,13,574 an awm Kum 2015-ah voter 2.19%-in an pung

Mizoram Electoral Roll 2015 chu nimin khan district election officer tinin an district ṭheuha DC pisaah an tlangzarh. Electoral Roll thara a lan danin, Mizoram pumah voter 7,13,574 an awm a, kum 2014 electoral roll aia kum 2015-a voter tamna chu 15,308 (2.19%) a ni.

Electoral roll 2015-ah hian Election Commission of India thu angin, January 1, 2015-a kum 18 tling chinte thun a ni a; electoral roll thar copy chu political party tin leh tlawmngai pawl ṭhenkhatte hnenah a thlawnin pek a ni. Mipui nawlpui tan phek khat Rs. 5 emaw, soft copy (CD) Rs. 100 emawin district election officer/DC office-ah lei theih a ni a, chief electoral officer website, www.ceomizoram.nic.in ah en theih a ni bawk.

Electoral roll 2015-a a lan danin, roll ennawn a nih hmain Mizoramah voter 6,98,266 (mipa 3,42,729 leh hmeichhia 3,55,537) an awm a; 2015 electoral roll-ah chuan mipa 3,49,792 leh hmeichhia 3,63,782, an vaiin voter 7,13,574 an awm. Kum 2015-ah hian voter mipa 7,063 leh hmeichhia 8,245-in an pung a; a pumpuia punna chu 15,308 (2.19%) a ni.

Constituency zingah Tui­chawng bialah voter tam berin, 27,314 an ni a, voter tlemna ber Thorang bialah 12,723 an awm. Lunglei South-ah voter punna percentage sang berin, 522 (3.4%)-in an pung a, punna percentage hniam ber Lengteng bialah 109 (0.67%)-in an pung. District zingah Saiha district-ah voter punna percentage a sang ber a, 2.85%-in an pung a; a hniam ber Champhai district-ah 1.55%-in an pung.

Assembly constituency 29-ah hmeichhia an tam zawk a, bial 11-ah mipa an tam zawk. Gender ratio chu 1000:1040 (mipa 1,000 zelah hmeichhia 1,040 an awm tihna) a ni.

Tripura-a Bru transit camp-ah voter 8,620 an awm a; chungte chu Mizorama an awmna polling station-ah section hran zelah dah an ni.