Khawthlir

Thisen pe
457 Field Hospital, Ṭhuampuia awm, army medical unit-te chuan nimin khan Aizawl Civil Hospital-ah thisen unit 18 an pe.

SWC director
Soil & Water Conservation joint director George Lalromawia chu director-ah a kaisang. Promotion order hi January 14, 2015 khan tihchhuah a ni.

Mizoramah Union Health Minister
Union Minister for Health and Family Welfare JP Nadda chuan January 30 hian Mizoram a rawn tlawh dawn a, a lo zin tur chungchang ngaihtuahin chief secretary Lalmalsawma hoin CS conference hall-ah mi pawimawhte an
ṭhukhawm.

Zu man zat
Excise & Narcotics department chuan December, 2014 chhung khan zu zuar 84, zu rui pakua, rakzu litres 3684.425 leh sapzu (um puitling) 9443 an man.

Lui humhalh
Ṭhiak leh Samlukhai V/C leh YMA chuan thuchhuah siamin, Chângte luia sanghate chu lên baka man an phal lo a, tûr leh hmaraw dang hmanga sangha mante chu an chunga a
ṭul anga hremna lekkawh an tum thu an tarlang.

Zobawk lawm
Zobawk Village Council Demand Committee chuan thuchhuah siamin, hun rei tak aṭanga an nawra an ngen tawh anga tun hnaia Mizoram sorkarin V/C a siam thar zingah Zobawk North leh Zobawk South V/C siam a ni ta chu lawmawm an tih thu an tarlang.

Inkap hlum
Kapbuanga (68), Pangzawl Ramrikawn chu a ram vahpui Ramherluaia (38), Pangzawl Ramrikawn vek chuan nimin khan an ram vahnaah sa emaw tiin a kap palh a, Kapbuanga hi a ka pa chhawn loin a thi.

Accident-ah thi
Nimin chawhnu dar 3 vel khan Maruti car chu Tuirial Airfield chhak kawng kawng thlang feet 20 velah a tlan liam a, a khalhtu Vanlalawia (28), Tuirial Airfied Veng chu a hmunah a thi.