MNYF-in MLPC Act copy an hâl

MNF ṭhalaite chuan Congress sorkarin nimin aṭanga MPLC Act an hmang ṭan chu lungchhiatthlak an tih thu an tarlang. MNYF-te hian MPLC Act an duh lohzia lantir nan nimin khan Mizo Hnam Run kawtah MLPC Act copy an hâl a, Aizawl khawpuiah poster an tár bawk.

MNYF chuan, zalen taka zu zawrh leh phalrai chu MNF chuan a din tirh aṭanga tun thlengin a la duh chhin ngai lo niin an sawi a, "Independence suala MNF a rammut lai pawh khan zu a lo khap tawh a, chhungkaw kehdarhna, tualthahna leh pawngsual bakah accident leh thil dang, a chhe zawnga thlentu a nih vangin zalen taka zawrh hi kan remti lo a ni," an ti.

Kohhran leh tlawmngai pawl hrang hrangte'n zu thlah zalen an duh lohzia an tarlan bakah, MLTP Act hman chhunzawm zel an duh thu nasa takin an puangzar tih sawiin, MNYF chuan, chungte chu sorkarin a bengkhawn duh lo niin an sawi a, "Sorkar sum tlakchhiatna nasa lutuk vanga sum tuak nana zu zawrh duhna thinlung an pu hi kan hrethiam thei lo," an ti a ni.

Hetih lai hian, Nimina MNF senior vice president Tawnluia hoa general secretary-te ṭhukhawm chuan, sorkarin tun hnaia buhfai man a tihsan te, chhiah a tihpunte leh thil dangte avangin a ṭul anga hmalak an rel a, vawiin hian huam zau zawkin an ngaihtuah dawn.

MNF thuchhuah chuan, "Sorkarin sum enkawl a thiam loh luat vang leh nuamtâwl a hmasak vanga sum tuakna atana miretheite chunga an ṭuan chiam mai hi ngaihzam mai chi-ah kan ngai lo," an ti a; buhfai man kg. khatah Rs. 15-a tihsan te, Revenue department-in chhiah an tisang vak te, tui leh electric bill uchuak taka tihsante chu mipuite zahlohna leh thamlohna niin an sawi a ni.