Inpeih loa MLPC Act hman dem

MPC ṭhalaite chuan thuchhuah siamin, kohhran leh tlawmngai pawl hrang hrangte'n an duh lo chung leh zu permit/licence mumal taka pek chhuah a la ni lo chunga Mizoram sorkarin January 15, 2015 aṭanga Mizoram Liquor (Prohibition and Control) Act a hmang ṭan chu ṭha lo an tih thu an tarlang.

MPCY chuan, "Mipuite chunga awmze mumal nei lo dan hman hi, a bikin zu in mite chunga hleilenna phurrit tak thlen thei, rûlin 'Ka mei rap se ka chù ang’ tihna ang chauh a ni," an ti a; MLPC Act-in a kaihhnawih thil ṭulte peih fel vek a nih hma chuan MLPC Act chu hmang rih lo turin sorkar an ngen.