Zira ban a tum lo

Home minister R Lal­zirliana chuan, tun hnaia Aizawl khawpuia ṭum thum tualthahna a thlen avanga banna thehluh a tum loh thu a sawi.

R Lalzirliana hian nimin khan Aizawl Press Club-ah thu thartheh­darhtute kawmin, "Tun hnaia thil thlengte khan ka rilru a tina takzet a ni. Aizawl khawpui bik hian remna kan nei a, muanna erawh kan nei tawh lo emaw ka ti hial. Rilru a na takzet zet a ni," a ti.

Tualthahna thlengte chu Home Minister a nih anga a mawhphurhnaa a ngaih thu sawiin R Lalzirliana chuan, "Heng thil thlengte avang hian tute emaw anga banna a dera thehluh ka duh lo. Heng thil hi hel tih chu nise ban chungchangah hian ka inngaihtuah nasa ang a, ka mawhphurhna hlen zo loah ka inngai ang," a ti a, mimal tualthahna erawh chu ven ngawt theih a nih loh thu a sawi.

Home Minister chuan Mizote'n kan nunphung engtin emaw kan her danglam a ngaia a hriat thu sawiin, "Kohhran lam aṭang pawhin Lal Isua Krista nun dan uar lehzuala kan inzirtir a ngai. Ṭhian chhan thih ngam kan nihnate hi inzirtir ṭhat leh a ngai tawh a ni," a ti.