Tul bik thilah lo chuan hna thar lak leh Lirthei lei khap a ni: Chief Minister

Chief minister Lal Than­hawla chuan, Mizoram sum dinhmun a chhiat avangin ṭul bik thilah lo chuan hna thar lak leh lirthei lei khap a nih thu a sawi.

Mizoram sorkar hnathawkte tana nimina Assembly Annexe conference hall-a sum renchem leh sum lak luh dan chungchang zirhona, Sentitization of Government Officials on Economy Measures & Resources Mobilisation-ah thu sawiin, Chief Minister chuan, "Hun khirh tak kan hmachhawn mek a, thutlukna khauh tak pawh siam a ngaih cháng a awm dawn a ni," a ti.

Lal Thanhawla chuan, tuna Mizoram sum dinhmun chu a hniam hle tih sawiin, "Hreh tak chunga thutlukna khauh tak, mahse ṭha bawk si lâk hi kan hreh tur a ni lo," a ti a; kum tam tak kal ta aṭangin sum hman tlem chu an thupui ber ni ṭhin mah se, tihpuitlin a harsat thu a sawi.

Finance department pawhin vawi tam tak inrenchem a ṭul thu a chhuah thin a, chung­te chuan zawm a hlawh ṭha lo hle ṭhin nia sawiin, Lal Thanhawla chuan, "Official-a zin leh motor petrol chungchangah kan inhrêk hle a ṭul. Delhi kal ngai kher loin Delhi Mizoram House-a officer on special duty (OSD) sorkarin a dah thar hi hman ṭangkai theih a ni," a ti.

Motor enkawlna leh work­shop bill tam tak sorkarin pek tur a neih thu sawiin, "Petrol quota piah lama coupon dil chíng an awm ṭhinte hi an inbihchian hle a ngai. Inrenchemna tura hmalaknaah tê lua a awm lo," a ti a; sum harsatna sutkian kawngah thiamna leh theihna thawhkhawm a, ṭan lak tlan a nih chuan thlaphânna tur a awm lo tih a sawi.

Finance minister Lalsawta pawhin, "Kan state sum leh pai dinhmun leh harsatna hi tun kum hnih khat thila awm a ni lo. Kum tam tak aṭanga lo inmun chho tawh, a kum têla lo nasa hret hret a ni. A bikin kum 2008-09 chhoa khawvel ram hrang hranga recession-in a nghawng kal zel kha a ni. Chuvangin, vawi leh khata siam ṭhat thut theih a ni lo a, ṭan kan lak mar pát reng a ngai a ni," a ti.

Inkhawm hi chief secretary Lalmalsawma'n a kaihruai a, sorkar department hrang hrang hotute'n sum inrenchem dan tur an sawiho a ni.