Khawthlir

Thisen pe
Pachhunga University College chuan nimin khan an college-ah blood donation camp an nei a, Aizawl Civil Hospital tan thisen unit 91 an pe a, a petute mipa 69 leh hmeichhia 22 an ni. PUC hian academic session kal lai, 2014-15 chhungin thisen ṭum thum an pe tawh a, unit 509 pe tawhin, target an siam unit 500 chu an khûm a ni.

Sunday School Day
UPC (NEI) chuan naktuk Pathianni hian Sunday School Day an hmang dawn a, kum 2014-a sunday school kai ṭha leh exam-a
tiṭhate hnenah lawmman an sem bakah, sunday school pawimawhzia inzirtina leh infuihthar nan an hmang ang. Sunday School Day hi kum tin January thlaa Pathianni vawi thumnaah an hmang ṭhin a ni.

Thiin chhar
Votesanga (65), Ṭhuampui chu nimin zing dar 6 vel khan Zemabawkah thia hmuh a ni a, a taksaah hliam hmuh a ni lo. Vortesanga hi BP sang nei nia thu dawn a ni.

Kudam hawng
Horticulture minister PC Lalthanliana chuan nimin khan Hortoki khuaah thlai thar dahkhawmna tur kudam leh tanky pahnih a hawng a; tui pump khawl 10 leh huan siamtu mi 100 hnenah cheng nuai 8.57 a sem bawk.

Committee din
Nimin khan Disaster Management & Rehabilitation department hnuaiah State Disaster Advisory Committee din a ni a, DMR minister C Ngunlianchunga chu chairman niin, DMR secretary chu member secretary a ni ang a, member dang 19 ruat a ni.

Mi 4 suspend
Champhaia Customs department-a thawkte zinga pali chu Zokhawthara Land Customs Station kudam aṭanga red sanders tum (log) 272 a bo avangin suspend an ni. Red sanders bo chungchangah hian a chhuitu tur investigation team din a ni.