Thil man tihsan duh loh lantirna atan MNF-in Jan. 22 ah kawng zawh dawn

MNF thuneitu sang, National Executive Committee (NEC) nimina Mizo Hnam Runa ṭhukhawm chuan, Congress sorkarin chhiah hrang hrang a tihsan duh loh lantirna atan January 22, 2015-ah district khawpui tinah ‘Mipui thlavâng hauhna kawngzawh’ neih an rel.

MNF NEC meeting chuan, chief minister Lal Thanhawla'n Mizoramah January 1, 2015 aṭanga buhfai man tihsan a nih hma pawhin Mizoram chu India rama buhfai tlawmna ber a nih thu a sawi nia tarlangin, "Hei hi kan finfiah nghal a, kan ṭhenawm state Arunachal Pradesh-ah kg. khat Rs. 8.30, Meghalaya-ah Rs. 12 a ni a, Tripura-ah Rs. 10.80 a ni. Hetianga dâwt an sawi mai ṭhin hi MNF chuan a ngai haw hle," an ti.

MNF tarlan danin, kum khat chhunga Mizoram mipui buhfai mamawh tâwk chu quintal nuai 16 chuang hret a ni a, kum 2013-2014 chhungin buhfai qtl. nuai 17 chuang lak luh a ni.

Mamawh bak kg. nuai 337 buhfai lei a nih thu sawiin MNF chuan, mamawh bak an lei chhanah puanhnuai thil a awm leh awm loh sawifiah turin sorkar an phût a ni.