Lirthei 75,000 velah HSRP vuah tawh Lirthei hluiah kan phût lo - Transport Minister
Lirtheia high security registrate plate (HSRP) vuah chu kalpui zel a ni a, tun thlengin lirthei 75,000 velah HSRP an vuah tawha thu dawn a ni. Hetihlai hian Transport minister John Rotluangliana chuan HSRP hi lirthei hluiah chuan an phut lem loh thu a sawi.
Mizoram puma lirthei awm zat chhinchhiah chu 1,40,000 vela ngaih a ni a; Transport department hotute chuan, HSRP chu Supreme thupek anga Ministry of Road Transport & Highway-in ti tura hma a lak anga kalpui a nih thu leh, vuah chhunzawm zel tur a nih thu an sawi.
Transport hotute chuan, lirthei tharah HSRP vuah nghal zel a nih thu te, June 2012 thlengin HSRP kalpui hmaa lirthei hluiah pawh tih vek tur a nih laiin, duh anga kalpui a harsat avangin la tih loh a awm thu an sawi a; HSRP vuah lote man tumna a awm rih loh thu sawiin, "Lirthei hluia HSRP vuah hi duh angin hmasawnna a chak thei lo," an ti.
HSRP vuah turin India ram pumah agency pariat thlan an ni a, Mizoramah chuan HSRP vuah turin State Purchase Advisory Board-in May 5, 2011-ah M/s Shimnit Utsch India Pvt. Ltd., Mumbai a thlang. M/s Shimnit Utsch India hian April 27, 2012-ah Mizoramah hna an thawk ṭan a, lirthei 75,000 velah HSRP an vuah tawh a, la vuah lohna lirthei 65,000 vel a awma ngaih a ni.
Transport minister John Rotluangliana chuan nimina Congress Bhavan-a thu a sawinaah high security registration plate chungchang sawiin, lirthei hluia bel turin sorkarin a phut lem loh thu a sawi a, "Motor tharah erawh mathei loa bel tur a ni," a ti.