CWC-in dan anga kal turin TNT an hrilh

Child Welfare Committee (CWC) member te, Social Welfare hotute leh Integrated Child Protection Scheme (ICPS) hotute chuan nimin khan Thutak Nunpuitu Team hmun an tlawh a; TNT-a awm mek naupangte leh kum 18 tling tawhte hmalam hun tur TNT hotute an sawipui a, TNT chu dan ang thlapa thil ti zel turin an hrilh.

TNT tlawhtute hi CWC chair­man Dr Lalkima leh CWC secretary leh Social Welfare deputy director Laldikkimi te hoin an kal a; CWC member Vanramchhuangi, ICPS-a programme officer Lalruatkimi, Aizawl DCPO, child protection officer, councillor leh protection officer-te an ni. TNT lam aṭangin hotupa ber Sangthankima leh general secretary Malsawmtluanga hoin an tel a, koh an nih angin kum 18 tling tawhte an tel bawk.

CWC hotute chuan TNT-a kum 18 tling tawhte chu kum 18 an tlin tawh avangin puitlinga ngaih an ni a, sorkarin nunphung pangngaia an awm theih nan sorkarin ṭanpui a duh thu a hrilh a; chhungte hre duh, hre si lote chu an zawnpui theih thu an sawi.

CWC chuan kum 18 tling tawhte chu nu leh pa leh chhungte an neih leh neih loh an zawt a, an neih thu sawi an awm lo. Chhungte hmu duh leh chhungte hnena chhuak duh an awm leh awm loh an zawt bawk a, TNT chhuahsan duh leh chhungte bula kal duh an awm lo bawk.

Kum 18 tling tawhte zinga pa­khat chuan, Sangthankima chu an pa a nih thu a sawi a, "Hei hi kan in a ni a, hei hi kan khawvel a ni," a ti. Pakhat dang chuan, hmun danga awm an ngaihtuah loh thu sawiin, "He ta awm tur hian intihluihna a awm lo," a ti.

TNT general secretary Mal­sawm­tluanga leh hotu dangte'n TNT-a an inenkawl dan te, nau an lak dante leh enkawl dante a sawi a; TNT-a fahrah enkawlte chu an birth certificate-ah pa hmingah Sangthankima tih a nih vek thu a sawi. "High school an kal laiin an kutkêa ding tur an nih thu kan zirtir nasa a, an duhthlanna kan dah lal a, kan nawr lui ngai lo," a ti.

Malsawmtluanga sawi danin, TNT-ah hian fahrah naupang an nih lai aṭanga enkawl, tuna kum 18 tling tawh enkawl mek 56 an awm a; chhuak tawh mi 68 (mipa 33 & hmeichhia 35) an awm. Chhuak tawhte chu an chhungte nena inbiak remnaa chhuak te, tlanchhuak te, pasal nei te, hna hmua chhuakte an ni.

CWC-in dan anga kal turin TNT an hrilh

CWC hotute chuan TNT hotute chu naupang lak leh kum tling tawhte awm dan turah dan anga an kal a ngaih thu an hrilh a, "Dan anga lak an awm ngai lo a, nau in lak dan hi sorkarin a pawm lo. Adoption reng reng chu CWC kaltlanga tih zel tur a ni. Naupang dikna leh chanvo in hriata in zawm a ngai," an ti.
CWC hotute sawi danin, dan zawm a ngaih angin, councillor leh case worker an ruai tur a ni a, chu chu professional/qualified worker an ni ngei tur a ni. An hlawh erawh chu sorkarin a tumsak ang. Hemi chungchangah hian TNT hotute chuan an lo ngaihtuah tur thu an sawi.
Laldikkimi chuan, TNT chu an hnathawh a ropui a, zahawm an tih thu a sawi rualin, tunah chuan dan a awm tawh avangin dan anga an kal a ngaih tawh tih Vanglaini palai a hrilh a, "Inla chhuak duh tawh, mahse an phal tlat loh vanga CWC-a zualko an tam ṭhin. Mahse tunah chuan chutiang chu a ziaawm tawh viau a ni," a ti a; TNT bakah home tam takin thil an zêp leh thup an neih ṭhin thu a sawi.
CWC hotute chuan, home-a fahrah enkawl puitlin, kum 18 tling tawhte chu nunphung pangngaia an nun theih nana inbuatsaih nan kum 21 an tlin thlengin sorkarin thla tin ṭanpuina Rs. 2,000 a pe thei tih an sawi bawk.
CWC chhinchhiah danin, TNT-ah hian fahrah naupang 414 an awm a, mipa 251 leh hmeichhia 163 an ni. Nu/pa nei lo 246 (mipa 157 leh hmeichhia 89) an awm a, rilru lama harsatna nei mipa pathum leh pianphunga harsatna nei mipa pathum leh hmeichhia pahnih an awm.