Buhfai man tihsanin mi retheite A nghawng lo: Supply Minister

Food Civil Supply & Consumers Affairs (FCS&CA) minister John Rotluangliana chuan, buhfai man tihtoin mirethei zawkte a nghawng lo niin a sawi.

FCS&CA minister hian nimin khan Congress Bhavan-ah thu a sawi a, "Ration buhfai lak chhuahna kg. khatah Rs. 5.30-a tihto hian mirethei zawkte a nghawng lo. BPL leh AAY-te hian man tlawma an lak ṭhin ang tho khan an la dawn a, hemi atan hian sorkar laipuiin thla tin quintal 52,200 min rawn pe ziah a ni," a ti.

Local supplier hnen aṭanga buhfai tláwm zawka lei a nih avang leh buhfai man tihto a nih avangin sorkarin kum tin Rs. 91,77,60,000 a hum dawn tih sawiin John Ro­tluangliana chuan, "Sorkar officer liante'n an ration card an rawn surrender ve chuan buhfai chuang liam mai bakah sum hum a tam leh zual dawn a ni," a ti a; buhfai man tihtlawm a nih avangin buhfai mana sorkar sum hloh kg. khatah Rs. 16.25 aṭangin Rs. 10.75-ah a tlakhniam thu a sawi.

John Rotluangliana chuan, FCI kudama awm tel loin Supply kudamah buhfai qtl. 1,70,000 chhêk khawl a nih thu sawiin, "Buh­fai chuang bâng kan nei thuai­in a rinawm. Surplus hi a awm hunah chuan thingtlangah kg. 8-a sem ṭhin hi kg. 10-ah tihpun a ni ang. NGO leh kohhrante'n sorkar ngenna an ngaih pawimawh chho zel a, special permit an dil tawh loh chuan mipui quota hi a pung zel dawn a ni," a ti.

FCS&CA Minister dawi danin, tun dinhmunah khaw pakhat chauh leh retailer pahnih chauhin an rin buhfai kudam a awm mek a, chung kudamte chu tihtawp vek tum a ni.