Oil & Gas renchem hapta hmang ṭan

Nimin khan I&PR Auditorium-ah hapta hnih chhung hman tur, Oil & Gas Conservation Fortnight hman ṭan a ni a, Food, Civil Supplies & Consumers Affairs secretary R Lalvena'n a hawng.

R Lalvena chuan, India ramah oil leh gas laih chhuah a tam lo tih sawiin, renchem a ngai hle tih a sawi a, "Tun hma deuh chuan oil hmanna tur lirthei leh khawl kan nei lo a, kein kan kal nasa. Iraq leh Middle East-a buaina thlengte pawh kan bengkhawn ngai lem lo. Tunah chuan khawl leh lirthei kan hmang nasa a, Middle East buaina leh petroleum lai chhuak hnem ramte sûk­thlêk kan ngaihven ta hle a, oil hian mimal tin min nghawng tawh vang a ni," a ti.

Supply secretary chuan, tunlaiin Direct Benefit Transfer kalpui tura tih mek a nih thu sawiin, ration card pakhat aia tam neih tum an awma hriat a nih thu a sawi a, "Kristian ram nen a inhmeh lo hle. Mipuite leh a buaipuitute'n dik taka tih hi an mawhphurhna a ni," a ti.

Oil & Gas Conservation Fortnight hawnnaah hian kalkhawmte'n oil leh gas renchemna kawnga theihtawp an chhuahna tur thutiam an sawi rual a ni.