News Lawrkhawm
Kângmei vèn
Aizawl District Fire Prevention Committee chu nimin khan Aizawl additional DC Lalchungnunga hoin a pisaah an ṭhukhawm a, kumin lo hâl huna kângmei vên dan tur an rel. District level awareness campaign chu January 28, 2015-ah Saitualah neih an rel a ni.
Tui lakna enfiah
Govt. deputy chief whip PL Pianmawia, MLA chuan Ningani khan Darlawn (Augmentation) Water Supply Scheme a tlawh a, hna thawh dan a enfiah. Darlawn Water Supply Scheme siamna hi North Eastern Council sum pek hmanga siam a ni a, cheng nuai 485.20 sênga siam zawh tura ruahman a ni.
Republic Day
Nimin khan Serchhip addl. DC VL Remliana hoin DC meeting room-ah department leh tlawmngai pawl hrang hrang aiawhte'n Republic Day hman dan tur an sawiho. Serchhipah hian Republic Day hi Leisekawt field-ah hman a nih bakah, JNM Hospital, Salvation Army Old Age Home, Adult Rehabilitation Centre leh Shalom Special School-ahte thilpek hlan a ni ang.