Minister-te aiin sorkar hnathawkte'n Nuam an tâwl zawk: Lal Thanhawla

Chief minister Lal Thanhawla chuan nimin khan Congress Bhavan-a inkhawmah thu sawiin, Congress sorkara minister-te aiin sorkar hnathawkte'n nuam an tâwl nasa zawk niin a sawi a, sorkar neitute aiin a hnathawkte an hausa zawk niin a sawi bawk.

MPCC president Lal Thanhawla chuan, "Sorkar neitute aiin a hnathawkte an hausa zawk a, mahni tana sorkar sum hmang an tam avangin sorkar pawhin a chhiat phah a ni," a ti.

Lal Thanhawla chuan, minister-te chu thlawhnaa an zin pawhin a man to chi, business class-ah an chuang ngam lo fo a, chutih laiin Mizoram sorkara secretary leh thawktu dangte chu an chuang ṭhin niin a sawi a; eptute'n sorkar an beihna tam tak chu sorkar hnathawkte vang nia sawiin, siamṭhat an tum thu a sawi bawk.

V/C inthlan tihbuai tumin Manipur ramriah helho an inlár leh tawh nia sawiin, Lal Thanhawla chuan, "Mizoram chhan nan sorkarin ṭan a la zel dawn a ni," a ti.

Chief minister chuan, MNF-te'n Congress sorkar chu sum enkawl thiam loh vanga zu zuarah puh mah se, MNF-te chuan zu an rûi zawk niin a sawi a; kohhrante'n an tih tur an tih tâwk loh avangin mipuiin zu chhia an in nasat phah nia sawiin, awmze nei zawk leh zu in lo thei lote'n zu ṭha an in theih nan sorkarin ṭan a la niin a sawi bawk.