MLPC Act hmangin hrem tawh
Zu chungchanga dan thar, January 15, 2015-a hman ṭan tâk, Mizoram Liquor Prohibition & Control Act hmangin nimin thleng khan hrem an awm nual tawh a; hrem hmasak ber chu Lalremliana (26), Lunglei Venghlun a ni.
Thu dawn danin, nimin khan Aizawl District Court-a chief judicial magistrate Sylvie Ralte chuan zu rûi chunga lirthei khalh vanga man mi pangate chu MLPC Act Section 43(2) hmangin thiam loh a chantir a, breath analyser hmangin zu an rui ngei tih finfiah a ni.
Mi pangate zinga pakhat chu pawisa chawi tura tih a ni a; pali chu ni thum chhung vantlang hna thawk tura tih an ni. Vantlang hna thawk tura tih zinga mi pahnih chuan Aizawl Civil Hospital compound tifai ang a, pahnih dangin Aizawl District Court compound an tifai thung ang a; an hnathawk lai chu police-te'n an veng dawn a ni.
MLPC Act hmanga hrem hmasak ber chu Lalremliana (26), Lunglei Venghlun a ni a, ani hi MLPC Act hman ṭan ni, january 15 khan Lunglei chief judicial magistrate chuan thla khat chhung táng turin a ti a ni. Lalremliana hian zu a rûi a, a chhungte leh ṭhenawmte tana ninawm khawpa a khawsak avangin police-in an man a ni.