Home Minister-in AR DIG hnenah Ruahmanna zâwm turin a chah
Home minister Lalchamliana chuan nimin chawhnu khan Mizorama Assam Rifles lal ber, 23 Sector DIG Brig. Vinod S chu a pisaah a ko a, tun hnaia Mizoram sorkar leh Assam Rifles inkara thu inhmu lo chungchang sawipuiin, Covid-19 laka mipui himna tura sorkarin ruahmanna a siamte zâwm thiam turin a hrilh. AR DIG chuan AR chungchangah mipuia thu thehdarh hmaa amah titipui tura a inhawn reng thu a sawi.
Home Minister chuan, Assam Rifles harsatnate a ngaihthlak rualin, Mizoram sorkar duh dante a hrilh a; ramri ven kawngah te, ruihhlo leh thil ṭha lo dang venna kawnga AR-te hna thawh chu Mizoram sorkarin a hria tih sawiin, thawhhona ṭha awm zel se a duh thu a sawi. Lalchamliana chuan, Brig. Vinod S chu thuchhuah siam zung zung lo tura chahin, harsatna an nei a nih chuan a hnena hrilh hreh lo tur leh dawhkan kîla sawiho hmasak ṭhin a ṭhat thu a hrilh a; Covid-19 vanga Mizoram sorkarin invenna leh fimkhurna tura ruahmanna a siamte pawh indanna ni loin, Mizoram mipui him tlànna tur a nih avangin zâwm zel turin a hrilh bawk.
AR DIG Brig. Vinod S chuan, tun hnaia thil thleng chungchang Assam Rifles lam thlîr dan leh harsatna an neihte a sawi a; Ministry of Home Affairs-in state leh state inkar leh state chhunga vahvel phalna a pe chungin, an chêt velnaah Mizoram sorkar ruahmannate zawm chu an duh ber a ni tih a sawi. Brig. Vinod S chuan, Mizote nen ṭhian an nihna vawnhim zel an duh thu te, social media leh thil danga thu vawrh darh hmaa amah biaa titipui duh tan a inhawn reng thu te, a enkawlna hnuaia awm AR sipai zingah dan bawhchhia leh che mawi lo an awm a nih chuan chiang taka finfiahna nen report thehlutin, an phu tâwk hremna a pek zel tur thute a sawi bawk.
August 18, 2020-a Vairengte checkgate-a Assam Rifles sipaite chêt dan avangin Chief Minister, Chief Secretary leh Central YMA hruaitute August 22-a ṭhukhawm chuan na taka hmalak zui an lo rel tawh a; Central YMA pawhin AR-te chu August thla chhung ngeia ngaihdam dil turin an phût mek bawk a ni.