Ṭha taka hnathawkte'n Nuai 3 dawng dawn - Thlenga

MNF vice president Lalthlengliana chuan, MNF sorkara SEDP hnuaiah ṭha taka hna thawkte'n cheng nuai thum emaw, a aia tam pawh an dawng ngei dawn niin a sawi.

Lalthlengliana hian nimin khan Aizawl Press Club-ah thuthar thehdarh­tute kâwmin, MNF-in sorkarna a siam hnu lawkah Chief Minister-in kawngpui a siam nghal thu a sawi a, "Lok Sabha MP inthlan puan a ni a, thla thum chhung Election Code of Conduct-in min phuar leh a, chumi hnuah sorkarin hmalakna a kalpui a, project ropui tak tak central-ah theh thlak a ni. Eng emaw zat min pawmsak laiin Covid-19 vangin duh angin hmalak theih a ni lo," a ti.

Zawhna chhangin Lalthlengliana chuan, SEDP hnuaiah ṭanpuina sem a nih tawh thu a sawi a, "An sum dawnte ṭha taka hmang a, ṭha taka hna thawkte chuan a tahtawlin an hnathawh ang zelin cheng nuai thum an dawng dawn a, a aia tam dawng pawh an awm ang," a ti a; thawk ṭha lote erawh chuan an dawng chhunzawm dawn lo tih a sawi.

Harsatna karah CM Zoramthanga kaihhruainain a theih ang angin hmalak zel thu a nih sawiin Lalthlengliana chuan, "MNF sorkar hi thla 18 chauha upa a ni a, Election Code of Conduct thla thum leh Covid-19 vangin thla nga vel hna thawh mumal theih a ni lo. Sorkar hian hnathawhna hun kum khat vel chauh a la nei. Harsatna karah inthlan dawna kan auhla tam tak tihhlawhtlin a ni tawh," a ti.

MNF vice president Lal­thlengliana chuan, August 27-a VC leh LC inthlan turah sorkar laipui ràwn a nih thu sawiin, "Mizoram sorkarin remchang in tih hunah a tih theih e. Covid-19 avangin social distancing nei chungin fimkhur takin ni khata in zo lo a nih pawhin, ni hnih chhung in ti tur a ni, tiin an rawn chhang a ni," a ti a; thla li chhung VC term pawhsei chu ṭhenkhatin sorkar beihna remchangah an hman thu a sawi.

State Election Commission-in mithiam ráwn chungin inthlan hun tur an thlir tih sawiin Lalthlengliana chuan, "Chumi hnuah inthlan hun tur puan a ni. Heti chung hian ṭhenkhat chuan inthlan hi sawn hlat a ṭha lo'm ni, tiin Governor-ah leh SEC-ahte lehkha an thehlut. VC/LC thlan hi SEC thu a ni chungin, sorkarin hun remchang thlir turin SEC kutah a hlan a ni," a ti a; SEC-in hun remchang an tihah inthlan buatsaih an tum thu a sawi.

MNF Vice President chuan MPCC treasurer Zo­din­tluanga Ralte-in Chief Minister thusawi chu naupang thlengin an nuih tih a sawi nia sawiin, "Congress hun laiin lei dawh panga a chim a, Pu Zodintluanga lei dawh chim nen chuan paruk a ni. Congress hun lai khan vawi eng emaw zat Treasury khâr a ni. Thâwk a phita kam chhe tleuhna atana ram hruaitute hman hian ram leh hnam a tihzahawm lo," a ti.

MNF chu inthlan turah beih rawn a nia sawiin Lalthlengliana chuan, "Sorkar hmasa hunah khan Covid-19 hi thleng ta se, Covid-19 vei, zu rui leh addict buaipui nen mipui kan buai khawp ang. Zu zawrh kan titawp a, buaina a tlem ta," a ti a; LC/VC inthlanah MNF candidate-te vote turin mipui a sáwm a ni.