Revenue deptt-in chhiah khawn mek Aizawl dist-ah nuai 510 hmuh beisei

Land Revenue & Settlement department chuan tunlai hian chhiah chi thum - leiman (land revenue), building tax leh Zoram chhiah an khawn mek. Chhiah chi thumte hi dan thar hman a nih angin, tihsan a ni hlawm a, Aizawl district-ah chuan cheng nuai 510 hmuh beisei a ni.

Vanglaini palaiin a kawm­naah Revenue department hotute chuan, chhiah tihsan a nih chhan chu - dan thar, 'The Mizoram (Land Revenue) Act 2013 (Act of No 5 of 2013)' an hman tawk vang a nih thu an sawi a; he dân thar hi June 27, 2014-ah sorkar chuan hman turin hriattirna a chhuah a ni.
Leiman leh Zoram chhiahte chu a tlangpuiin kum nga danah an tidanglam ṭhin a; tuna an lak erawh chu dan thar hman avangin, kum 2011-a tihdanglam chu kum 2013-ah an tidanglam leh a ni. Department hotute chuan, chhiah an lâk pung chu tam angin lang mah se, electric bill leh tuil bill anga thla tin pek a ni lo a, kum khata vawi khat pek a nih avangin a tam angin a lang hma niin an sawi.
Building tax an lak tel chhan zawhna chhangin, Revenue department hotute chuan, AMC-in Property Tax a lakna turah dân felfai an la neih loh avangin an la la thei mai si lo a, Property Tax lak hmain building tax chu an lo lak rih a ngai niin an sawi a; building tax lak chungchang chu an dan neihah pawh a inziak niin an sawi a ni.
Land Revenue & Settlement department hotute chuan, AMC-in Property Tax an lak tur chu April 2015-ah an la ṭan dawn chauh niin an sawi a, "AMC-in Property Tax an lak hunah chuan building tax chu lak chhunzawm a ni dawn lo," an ti.
Chhiah lakna dan hman mek hi kum 2006-ah hman ṭan a ni a, kum 2011-ah siam danglam a nih hnuah kum 2013-ah tihdanglam lehin, Mizoram (Land Revenue) Act 2013 an hmang ta a ni.
Revenue department hotute chuan chhiah chu pung mah se, leiman bik chu a pung tam lutuk lo nia sawiin, ram an neih zauh dan azirin a tam mai niin an sawi a, "Tuna chhiah an lak mek hi January 12, 2015 aṭangin an ṭan a, dânin a sawi angin February thla chhunga zawhfel hman tum a ni a, March thla chhungin inziah fel hman tum a ni," an ti a; hun tiam chhunga pe hman lote chu office-ah 20% châwi belhin pek theih a nih thu an sawi.
Land revenue & Settlement hian leiman, Zoram chhiah leh building tax aṭang hian Aizawl khawpui chhung bik
aṭangin cheng nuai 450 hmuh an beisei a; Aizawl district chhung thingtlang khaw hrang hrang
aṭangin cheng nuai 60 hmuh an inbeisei bawk a ni.