Khawthlir

Thisen pe
Chanmari West branch YMA chuan an din champha vawi 25-na, silver jubilee lawm nan Inrinni khan an veng middle school-ah blood donation camp an huaihawt a, Aizawl Civil Hospital tan thisen unit 161 an pe a, a petute mipa 124 leh hmeichhia 37 an ni.

Tuitla hmu
January 16, 2015 tlai lama Serlui-B Hydel Project tuikhuaha tla hlum nia hriat, Ramfangliana (36) s/o CT Khupa (L), Rengtekawn chu January 17, Inrinni chawhma lam khan Serlui tuikhuahah a ruang hmuh a ni.

Sikul hawng
Ṭhuampui, Lunglei district-a RMSA Secondary School building sak thar chu Inrinni khan bialtu MLA, Chalrosanga Ralte-in a hawng. Sikul sak nan hian cheng nuai 48.5 sen a ni.

Motor insu-ah thi
Nimin chawhnu dar 3 pelh hret khan Bawngkawn-Sairang kawng, Edenthar Veng chunga Lane-Tâwi ah bike leh truck an insû a, bike khalhtu K Lalfakzuala (22) s/o James Lallawmsiama, Ramthar Veng, Aizawl chu Aizawl Civil Hospital thlenpui a nih hnuah a thi. Bike hnunga chuang Jeffrey Lalhruaizela (21) c/o David Lalrohlua, Ramthar Veng na takin a hliam bawk.

Hall thar hawng
Mizoram Law Commission chairman, John Siamkunga, MLA chuan Inrinni khan a bial chhunga South Vanlaiphai community hall sak thar a hawng. Hall hi BADP sum cheng nuai 15 sênga sak a ni. Hall hawnna inkhawm neih rualin Soil & Water Conservation leh Horticulture department hnuaiah NLUP ṭanpuina chhungkaw 195 hnenah a sem nghal bawk.

Mi paruk hrem
Nimin khan Aizawl District Court chuan MLPC Act hmangin mi paruk thiam loh a chantir a; mi pangate chu ni thum chhung Aizawl Civil Hospital tifai tura tih an ni. MPLC Act hi district dangah pawh khauh taka kenkawh mek a ni a, hman a nih aṭanga ni thum chhungin district dangah pawh hrem an awm tawh a ni.