Iron awm loh vangin harsatna tâwk mek

Health department hnuaia sub-centre leh health clinic-te chuan tunlai hian nu nau paiin damdawi an ei ṭhin, Iron an tlachham a, nu nau paite'n harsatna an tâwk mek.

Health department-ah hian Aizawl khawpuiah main centre pali - Aizawl North, Aizawl South, Aizawl East, Aizawl West-te a awm a; main centre hnuaiah chuan Health sub-center leh Health clinic ṭhahnem tak an awm leh a ni.

Iron damdawi hi nu nau pâite'n a thlawna an dawn ṭhin a ni a, mi pakhatin nau a pai hun chhung, thla kua chhungin mûm 100 a ei a ngai. Iron chu nau paite'n Health sub-center leh clinic-ah a thlawnin an la mai ṭhin a, mahse tunah chuan lak tur a awm mumal lo niin an sawi.

Thu dawn danin, Health sub-center leh Health clinic-te chuan nikum chhung khan iron hi ṭum hnih, chawh rualin mûm 300-500 vel zelin an dawng hlawm a, nau pai an hnena inziak lutte'n an inchan lo hle.

Sub-centre leh clinic-a thawkte chuan Iron pek tur an neih loh avangin nau paite chu an lo ziahsak ṭhin an sawi a, a leina nei lote chuan Iron chu an ei loh phah fo tih an sawi. Sub-center leh clinic-a thawkte chuan, an mimal suma an lei chángte pawh a awm niin an sawi bawk.

Zawhna chhangin, Health sub-center leh clinic-a thawkte chuan, nikum chhung khan sub-centre ten untied fund, maintenance leh sanitation fund atana an dawn ṭhin leh Health clinic-te'n ṭanpuina an dawn ṭhinte chu tun thlengin an la dawng lo niin an sawi a, "Hna thawh kawngah harsatna kan tawh phah a ni," an ti.

Thu dawn danin, Health sub-centre leh clinic tam tak chuan Iron leh Folic Acid an tlakchham bakah, HB test-na tur an nei lo a, dressing atana mamawh lapua leh bandage-te pawh an indaih lo a; sikserh damdawi leh a enfiahna hmanruate leh Betadine-te erawh chu an la nei nual rih thung.