Buhfai man tihsan vangin kum khatah Cheng vbc. 49.92 hum theih inbeisei

Food, Civil Supplies & Consumer Affairs department chuan January 1, 215 aṭangin Above Poverty Line (APL) chhungkuate ration buhfai khulna chu kg. khatah Rs. 9.50 aṭangin Rs. 15-ah a tisang a, hei vang hian kum khatah cheng vbc. 49.92 hum theih an inbeisei.

Mipuiin ration buhfai an leina rate kg. khatah Rs. 9.50 hi kum 2002-a hman ṭan a ni a, kum 12 chhung hman a nih hnuah Rs. 15-ah tihsan a ni. Tuna Rs. 15-a tihsan a nih chhan chu - sorkar sum harsat vang ni loin, thil hrang hrang man a san nasat tawh vang niin Supply department hotute chuan an sawi. Tuna a rate ang chuan, retailer-te'n Supply kudam aṭangin kg. khat Rs. 14.50-in an la a, APL chhungkaw hnenah Rs. 15-in an hralh a ni.

FCS&CA department chuan November 2014 aṭangin FCI aṭanga economic rate-a buhfai an lei ṭhin chu an titawp a, buhfai supply tura an thlan contractor aṭangin buhfai an lei ṭan thung. APL chhungkaw tana mimal contractor aṭanga buhfai an leina rate hi FCI aṭanga economic rate-a an leina rate aia a hniam zawk avangin kum khatah cheng vbc. 38.88 an hlêp phah dawna ngaih a ni.

Economic cost-a FCI aṭanga buhfai an leiin qtl. khat Rs. 2,981-in an lei a, mimal contractor erawh chuan qtl. khat Rs. 2,575-in a pe thei a; qtl. khatah Rs. 406 zel sorkarin a hlêp thei a ni.

Hetih lai hian Central duhdan anga March thla tawp hmaa sorkarin food security act a ti hlawhtling thei anih chuan APL chhungkuate chuan buhfai hi a man tlawmin an lei leh thei dawn a, kg 1 Rs 3 a lei tur a ni ang. Tuna buhfai man tihsanah hian BPL leh AAY a huam lo a ni.

Hetih lai hian, FCS&CA hotute chuan, Mizoram sorkarin Food Security Act a hmang thei a nih chuan, APL chhungkuate'n buhfai an leina man chu a tla­hniam tura ngaih a nih thu an sawi. Mizorama APL chhungkuaah mi 5,82,200 an awm a, Food Security hman a nih chuan, APL chhungkuaa mi pakhatin thla khatah buhfai kg. 5 zel an lei thei dawn a, kg. khat man chu Rs. 3 a ni ang.

Mizoramah AAY chhungkua 26,000 (mi 1,24,000) an awm a, anni hian thla khatah a hlawmin buhfai kg. 35 an la thei. BPL chhungkaw tan thla khatah mi pakhat tan kg. 8 zela pek a ni a, Food Security hman hunah erawh chuan BPL a awm tawh dawn lo.

Thingtlang tan bik thla khata kg. 8 pek mek chu a beitham deuha an hriat vangin Supply department hotute chuan tam zawk pek dan a ngaihtuah mek a; Food Security hman hunah mi pakhat tan kg. 5 zel pek tura tih a nih sei avangin, tuna an dawn aia tlem an dawng dawn tihna a ni.

Food Security Act hi sorkar laipui chuan March 2015 ral hmaa hmang ṭan turin state tinte a hriattir a, Mizoram sorkar pawhin a bawhzui mek a, Law & Judicial leh Finance department-te'n Rules & Guidelines an buaipui mek a ni.