MNF-in total bandh an tintuah

MNF chuan, Congress kaihhruai sorkarin buhfai man, chhiah leh mipui ni tin mamawh man a tihsan duh loh lantir nana district tina kawngzawh an tum chu total bandh-a chhunzawm turin an inrua­hman nghal.

MNF elected office bearer te, general secretary-te leh adviser-te chu Inrinni khan Mizo Hnam Runah ṭhukhawm­in, January 22-a district khawpui tina Congress sorkarin chhiah hrang hrang a tihsan duh loh lantirna atana ‘Mipui thlavâng hauhna kawngzawh’ neih an rel tawha hmalak dan turte an sawiho a; kawngzawh dan turah ruahmanna hrang hrang an siam a ni.

Inrinnia meeting-ah hian, kawngzawh mai bakah, total bandh thleng­a huaihawt turin MNF hruaitute chuan rua­hmanna an siam a, total bandh neih hun tur erawh an la tichiang lo thung.

MNF-te'n an dodal tur hi January 1, 2015 aṭanga buhfai man tihsan te, Zoram chhiah leh leiman nasa taka tihsan te, thisen sawngbawl man unit khatah Rs. 550 lâk te, tui leh electric bill tisan te, zu zawrh theihna dan hman tak vangte a ni.

Hetih lai hian, MNF-te chuan Inrinni khan thu­chhuah siamin, MPCC president Lal Than­hawla'n, minister-te aiin officer-te’n motor an neih ṭhat zawk thu leh officer-te’n nuam an tâwl nasa zawk anga a sawi chu mahni mawng hlîmnaa an ngaih thu an tarlang.

MNF chuan, Cong­ress sorkar term hmasa ṭan tir lam, April 17, 2009-ah minister-te leh parliamentary secretary-te official car tur Verna car 17 lei a ni a, Rs. 1,21,37,337 hman a nih thu an sawi a; April 2009-a car leite chu kum nga âwrh a nih laiin, March 2014-ah minister leh parliamentary secretary-te motor tur lei nan Rs. 3,41,50,000 Treasury-ah challan an siam leh nghal niin an sawi.

MNF chuan, "Mahni hman tur motor lei nana khaw êng pawh zah zo loa hna hmasaa neia an inhaivûr mawlh mawlh lai hian, sorkar hnathawkte motor kawlte thîkna rilru nena Pu Hawla'n thu a sawi leh ṭhin hi, amah inenfiah hmasa phawt se kan duh. Amah aṭanga bul ṭan ngai a nihna te, nuamtâwl chu amâ chìn chhuah a nihnate hria se kan duh a ni," an ti.

MNF chuan, Supply minister John Rotluangliana’n'n APL buhfai man Rs. 9.50 aṭanga Rs. 15-a tihsan chuan mirethei BPL leh AAY-te a nghawng ve lo, tia a sawi chu fin vervekna thinlung aṭanga sawia an ngaih thu an sawi a, "Central-in ram pumah BPL leh AAY buhfai pek dan phung felfai tak a nei a, a man pawh sorkar laipuiin a bithliah sa vek a, state sorkarin lo tihdanglam chi a ni lo," an ti.