ZNP vice president-in CM a chháng

ZNP vice president K Lian­tlinga chuan Inrinni khan Aizawl Press Club-ah thuthar thehdarhtute a kâwm a; chief minister Lal Thanhawla'n mi ṭhenkhatin Central-ah NLUP an hêk nia a sawi chu chhangin, NLUP chu an hek lo a, a nih phung dik tak, party induhsakna atana an hman dan leh state plan fund aṭanga sem a nih dante Central sorkar hotute hnenah thlen a ni zawk niin a sawi.

K Liantlinga chuan, kum 2008 inthlan dawnah Congress hotute'n NLUP chu auhla berah an hmang a, Prime Minister Special Package aṭanga pek tur tiin, mirethei leh chhungkaw hnuaihnung te, mahnia eizawnna bul ṭan thei lote dâwmkân nan tih a nih thu uar takin an sawi ṭhin tih a sawi.

NLUP sum chu PM Special Package a ni lo a, Mizoram state plan fund aṭanga pek a nih thu sawiin, K Liantlinga chuan, "State plan fund aṭanga pek a nih thu hi Finance Minister pawhin Assembly House-ah a lo sawi tawh a ni," a ti a; state plan fund aṭanga sem a ni chungin Congress party mite induhsakna atan an hmang a, rualkhai lo takin an sem niin a sawi a ni.

K Liantlinga sawi danin, NLUP dawngtu tur thlangtute chu Congress unit hruaitute an ni a, NLUP dawngtu 88.6% chu Congress party mi leh sa an ni. A dang 11.4% chu neutral leh Congress party-a lut tura thlêm paha an pekte an ni.

Mipui pawisa atana dah ni si, Congress party mite duhsak bik nana hman chu Zoram mipuite tan a thinrimthlak avangin ngawihbopui chi-ah an ngai lo tih sawiin, K Liantlinga chuan, "Pu Lal Thanhawla sorkar thiltih dan dik lo tak hi Central sorkar hian a lo hriat ve ṭul kan tih avangin, kohhran leh NGO-te leh Zoram mipui hriat chian em em hi kan zu tarlang mai a ni," a ti.

K Liantlinga chuan, state plan fund sum vbc. 1400 chuang mipui tan ni lo, party mal induhsakna atana an hmang chu a chhui chiangtu tur Commission din ni se an duh thu a sawi bawk.

ZNP vice president chuan, Congress sorkarin sum enkawl a thiam loh avangin leiba cheng vbc. 5,000 a tling tawh a, vbc. 880 vel K-Deposit ah an dah niin a sawi a; Congress sorkar chuan sum hmuh tumin, mipui tawrhna nasa tak thlen zawngin thil man chi hrang hrang a tisang ta niin a sawi a ni.

K Liantlinga chuan, zu chungchangah kohhran duh dan chu ZNP duh dan a nih thu sawiin, "Zu permit lak chhuah nana form Rs 20-a an hralh leh zu lei phalna Rs. 1,000-a tlanchhuah a ngai hi thil fel lo inthup a awmin a ngaih theih," a ti a; buhfai man 58%-a tihsan a ni chu Zoram mipuite tham lohnaah an ngai tih a sawi.

ZNP vice president chuan, miin tlawmngaiin a thlawna thisen an pek laia sorkarin a insen ve turte seng duh loa blood bag pakhat zelah damlote aṭanga Rs. 550 lak a ti chu lungchhiatthlak an tih thu te, sikul naupang chawchhun tur kum chanve atan nuai 700 chuang an batsak mek thu te, minister leh parliamentary secretary-te car tur an duh ang tâwka an lei hnua lirthei lei an khap leh ngawt chu an hriatthiam loh thute a sawi bawk.